Түрээслээд өмчлөх орон сууцны бүртгэл ирэх сард эхэлнэ

Төрийн орон сууцны корпораци (ТОСК)-иас хэрэгжүүлж буй "Солонго 1, 2" орлогод нийцсэн орон сууцны хорооллын эхний ээлжийн цахим бүртгэл, сонгон шалгаруулалтыг ирэх есдүгээр сард албан ёсоор эхэлнэ. Хан-Уул дүүргийн 21 дүгээр хорооны нутаг дэвсгэрт, Нисэхийн ойролцоо баригдсан тус хорооллын эхний ээлжийн 2,042 айлын орон сууцыг Улсын комисс хүлээн авсан бөгөөд автоматжуулсан эрэмбэлэх системийн програм хангамжийн эцсийн туршилт болон үл хөдлөх хөрөнгийг хүлээн авах ажиллагааг бүрэн дуусгах үүднээс ийнхүү хугацааг сунгасан байна. Нийт 5,002 айлын багтаамжтай тус төслийн үлдэгдэл 2,960 орон сууцыг ирэх оны наймдугаар сарын сүүл гэхэд ашиглалтад оруулахаар төлөвлөжээ.

Иргэд "tosk.gov.mn" цахим хуудсаар нэвтрэн, төрийн мэдээлэл солилцооны "ДАН" болон "ХУР" системээр дамжуулан бүртгүүлэх юм. Энэ систем нь өргөдөл гаргагчийн орон сууцны байдал, өрхийн бүрэлдэхүүн, татварын түүх зэрэг шаардлагатай бүх мэдээллийг улсын бүртгэлийн сангаас автоматаар татаж шалгах тул иргэд

• Хорооны тодорхойлолт,
•  Цалингийн тодорхойлолт,
• Ажлын газрын тодорхойлолт зэрэг бичиг баримтыг бүрдүүлэх шаардлагагүй. Бүртгэлийн систем нээгдсэнээс хойш 14 хоногийн хугацаанд идэвхтэй байх бөгөөд үүнээс өмнө холбогдох байгууллагууд хамтарсан хэвлэлийн хурал хийж, зааварчилгааг олон нийтэд хүргэх ажээ.

Төсөлд хамрагдах хүсэлт гаргагчдад тодорхой үндсэн шаардлагуудыг тавьж байна. Үүнд,

• 18 насанд хүрсэн, нийслэл хотын байнгын оршин суугч байх бөгөөд одоогоор гэр хороололд амьдардаг,
• Төвийн инженерийн шугам сүлжээнд холбогдсон орон сууц өмчилж байгаагүй байх шаардлагатай.
• Мөн тогтвортой ажил эрхэлдэг, одоогийн ажлын газартаа нэгээс доошгүй жил ажилласан байх ёстой юм. 

Сонгон шалгаруулалтыг хүний оролцоогүйгээр, 100 онооны үнэлгээний системээр автоматаар эрэмбэлж тодруулна. Өмнөх орон сууцны хүлээлгийн дарааллууд хүчингүйд тооцогдох бөгөөд зөвхөн одоогийн системийн оноонд тулгуурлан шийдвэр гаргах аж. Эхний ээлжийн 2,042 орон сууцыг нийгмийн зорилтот бүлгүүдэд хуваарилахдаа багш, эмч зэрэг төрийн үйлчилгээний албан хаагчдад 20 хувь, ахмад настнуудад 18 хувь, залуу гэр бүлүүд болон төрийн захиргааны тусгай албан хаагчдад тус бүр 15 хувийг ногдуулахаар тогтоосон байна. Мөн хувийн хэвшил болон хувиараа хөдөлмөр эрхлэгчдэд 10 хувь, хөгжлийн бэрхшээлтэй иргэд болон тэдний гэр бүлд 10 хувь, өрх толгойлсон эцэг эх, олон хүүхэдтэй гэр бүлүүдэд тус бүр 5 хувь, байгалийн гамшигт нэрвэгдсэн өрхүүдэд 2 хувийн квот тус тус олгохоор шийдвэрлэжээ.

Энэхүү төсөл нь халамжийн хөтөлбөр биш тул иргэдээс тогтоосон доод орлогын түвшинг шаардах бөгөөд төлбөрийн хоёр төрлийн нөхцөлийг санал болгож байна. Орон сууцны түрээсийн үнэ нэг квадрат метр нь 11,880-аас 15,800 төгрөгийн хооронд байхаар эцэслэн тогтоогдсон бөгөөд 50 квадрат метр талбайтай сууцны сарын төлбөр дунджаар 650,000-аас 792,000 төгрөг байна. Түрээслээд өмчлөх нөхцөлийг сонгосон иргэд эхний жилдээ орон сууцаа түрээслэх бөгөөд гэрээний зөрчил гаргаагүй тохиолдолд өмчлөх шатанд шилжиж, 5 хүртэлх жилийн хугацаанд урьдчилгаа 30 хувийн төлбөрийг хуваарийн дагуу хуримтлуулах үүрэг хүлээнэ. Харин зөвхөн түрээслэх нөхцөлөөр амьдрах иргэд 3 сарын түрээстэй тэнцэх хэмжээний барьцаа төлбөрийг урьдчилан байршуулах шаардлагатай.