Узбекистанд болсон Дэлхийн шатрын олимпиадад эмэгтэй шигшээ баг долоодугаар байрт шалгарлаа

Узбекистан улсын Самарканд хотын Торгоны замын олон улсын үзэсгэлэнгийн төвд зохион байгуулагдсан Дэлхийн шатрын 46 дугаар олимпиад өндөрлөж, манай улсын эмэгтэйчүүдийн шигшээ баг түүхэн амжилт үзүүлэн долоодугаар байрт шалгарлаа. Есдүгээр сарын 15-наас 27-ны өдрүүдэд үргэлжилсэн тус тэмцээнд эмэгтэй болон эрэгтэй шигшээ багийн тамирчид дэлхийн шилдэг багуудтай өндөр түвшинд өрсөлдлөө.

Эмэгтэйчүүдийн шигшээ баг нийт 11 өрөг тоглож 8 хожил, 1 тэнцээ, 2 хожигдон 17 оноотойгоор тэмцээний долоодугаар байрт шалгарав. Тэд хүрэл медаль хүртсэн Энэтхэг, мөн АНУ, Польш, Армени зэрэг дэлхийн шатрын хүчирхэг гүрнүүдтэй ижил оноо цуглуулсан бөгөөд нэмэлт үзүүлэлтээр медалийн тавцанд багтаж чадаагүй байна.

Тэмцээний явцад эмэгтэйчүүдийн баг эхний өрөгт Палестиныг 4-0 харьцаатай хожиж, дөрөвдүгээр өрөгт Испанийн багийг 2.5-1.5 харьцаатай буулган авсан юм. Түүнчлэн долоо болон наймдугаар өрөгт Франц, Болгарын багуудыг дараалан хожсон бөгөөд Болгарын эсрэг тоглолтод их мастер Төрмөнхийн Мөнхзул шийдвэрлэх ялалтыг авчирснаар эмэгтэй баг шилдэг дөрвөн багийн эгнээнд багтаж байв.

Есдүгээр өрөгт тэмцээний мөнгөн медаль хүртсэн Казахстан улсын багтай 2-2 харьцаатай тэнцэхэд Хишигбаатарын Баясгалан, Батхуягийн Мөнгөнтуул нар чухал хожлуудыг авсан бол сүүлийн өрөгт Грекийн багийг 2.5-1.5 харьцаатай хожсоноор түүхэн амжилтаа баталгаажууллаа. Багийн бүрэлдэхүүнд Бат-Эрдэнийн Мөнгөнзул, Батхуягийн Мөнгөнтуул, Төрмөнхийн Мөнхзул, Хишигбаатарын Баясгалан, Баяржаргалын Баярмаа нар багтаж, багийн ахлагчаар Цэрэндоржийн Батсайхан ажиллалаа.

Эрэгтэй шигшээ баг нээлттэй ангилалд 7 хожил, 1 тэнцээ, 3 хожигдол авч, 15 оноотойгоор 26 дугаар байрт шалгарлаа. Эрэгтэй багийн хувьд тэмцээний хоёрдугаар өрөгт дэлхийн чансааг тэргүүлэгч АНУ-ын багтай хийсэн тоглолт онцлох үйл явдал байв. АНУ-ын баг 2.5-1.5 харьцаатай ялалт байгуулсан ч олон улсын мастер Хуягцогтын Итгэл дэлхийн чансааны 36-д эрэмбэлэгддэг их мастер Авондер Лиангийг хожсон юм. Мөн олон улсын мастер Мөнхдалайн Амилал дэлхийн шилдэг шатарчдын нэг Ханс Ниманнтай тэнцсэн байна.

Үүний дараа эрэгтэй баг Угандаг 3-1, Шри-Ланкийг 2.5-1.5 харьцаатай хожих зэргээр чухал ялалтуудыг байгуулжээ. Эрэгтэй багийн бүрэлдэхүүнд Сумъяагийн Билгүүн, Мөнхдалайн Амилал, Ганзоригийн Амартүвшин, Хуягцогтын Итгэл нар тоглож, багийн ахлагчаар Ануугийн Баяр ажиллав.

Тэмцээний ерөнхий дүнгээр нээлттэй ангилалд зохион байгуулагч орон болох Узбекистан улс алтан медаль хүртэж, Энэтхэг мөнгө, Герман хүрэл медаль хүртсэн бол эмэгтэй ангилалд БНХАУ алт, Казахстан мөнгө, Энэтхэг хүрэл медалийн эзэд болсон байна.