Нийслэлд +30-ууд ноёрхож эхэллээ
Нийслэлд үнэмлэхүй ялалт байгуулсан МАН энэ удаад нийслэл, дүүргийн удирдах албан тушаалд гуч гаруй насны залуус хүч түрж байна. “Ах” нам хөгшин, коммунист имижтэй ч гэлээ шинэ залуу ше, залгамж халаагаа бэлдэх талдаа аль ч улс төрийн хүчнээс илүүрхдэгийг дурдах юун.
НИТХ-ын даргаар томилогдсон А.Баяр, Нийслэлийн Засаг Даргын орлогч А.Амартүвшин хоёулаа 1985 оны 39-түүд. А.Баяр нь УИХ-ын гишүүн А.Бат-Амгалангийн хүн бол А.Амартүвшин нь УИХ-ын гишүүн Ж.Алдаржавхлангийн хүн. Олон жил дүүргийн түвшинд ажиллаж туршлагажсан, хэл устай, цэвэр цэмцгэр жентельменүүд ирэх дөрвөн жилд Нямбаа даргатай хамтран нийслэлийг удирдана.
Цаашилбал Улаанбаатарын Каннам гэгддэг Хан-Уул дүүргийн ИТХ-ын даргаар Ч.Бат-Оргил, хамгийн их хүн амтай дүүрэг Баянзүрхийн шинэ засгаар Г.Жаргалсайхан, Баянгол дүүргийн ИТХ-ын даргаар П.Өлзийнаран нарын шижигнэсэн залуус сонгогдоод байна.
Хан-Уул дүүргийн ИТХ-ын дарга Ч.Бат-Оргил, 1987 онд төрсөн, эдийн засагч мэргэжилтэй, дүүрэгт анхан шатнаас бэлтгэдсэн боловсон хүчин.
Баянзүрх дүүргийн Засаг дарга Г.Жаргалсайхан 1988 онд төрсөн, эдийн засагч мэргэжилтэй, сүүлийн дөрвөн жил тус дүүргийн Засаг даргын орлогчоор ажилласан туршлагатай бол Баянгол дүүргийн ИТХ-ын дарга П.Өлзийнаран инженер, эдийн засагч мэргэжилтэй 40 шүргэж залуу эр.
