УИХ-ын гишүүн, Боловсролын сайд асан Ц.Цогзолмаа Монгол Улсын Гавьяат Багш цолоор шагнууллаа
Боловсролын салбарын эрх зүйн шинэчлэлийг боловсронгуй болгон хөгжүүлэх үйлсэд үнэтэй хувь нэмэр оруулж, багшийн хөдөлмөрийн үнэлэмжийг зөв тогтоох, цалин урамшууллын оновчтой тогтолцоог бий болгох, хүүхэд хамгааллын бодлого, эрүүл мэндийн болон тусгай хэрэгцээт боловсролыг хөгжүүлэх, багшлах боловсон хүчнийг бэлтгэх, тэдний мэдлэг чадварыг дээшлүүлэх үйлсэд онцгой идэвх санаачилгатай ажилласан тул УИХ-ын Тамгын газрын дэргэдэх Парламентын судалгаа, хөгжлийн хүрээлэнгийн Бодлогын зөвлөлийн гишүүн Цэдэнбалын Цогзолмааг Монгол Улсын Гавьяат Багш цолоор шагнажээ.
Ц.Цогзолмаа 1986-1992 онд ЗХУ-ын Эрхүү хотын Улсын багшийн их сургуулийг багш мэргэжлээр төгссөн бөгөөд 1993-1996 онд Ховд аймагт ажиллажээ. Энэ хугацаанд Монгол Улсын их сургуулийн Ховд дахь салбарт багш, аймгийн Хүүхдийн төвд Хүүхдийн асуудал хариуцсан арга зүйч, Ховд аймгийн Засаг даргын Тамгын газарт мэргэжилтэн, Ховд аймгийн ИТХ-д мэргэжилтэн, Ховд аймгийн эмэгтэйчүүдийн зөвлөлийн даргаар тус, тус ажилласан байна. Харин 1997 оноос одоог хүртэл Улаанбаатар хотод тасралтгүй төр, нийгэм, улс төрийн салбарт ажиллаж очсон салбар бүртээ шинийг санаачлан, үр дүнд хүргэн ялангуяа хүүхэд, залуучууд, эмэгтэйчүүд, боловсролын салбарт эрдэмтэн судлаач, хамтран ажиллагсадтайгаа олон өөрчлөлт, шинэчлэлтийг хэрэгжүүлсээр иржээ.
Тэрбээр 2016-2020 онд УИХ-ын гишүүнээр ажиллахдаа 13 хууль шинээр санаачлах буюу ажлын хэсэгт орж ажилласан юм. Зарим хуулиас дурдвал:
-Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт, өөрчлөлт оруулах тухай хууль батлагдсан.
-Гэр бүлийн хүчирхийлэлтэй тэмцэх тухай хуулийн шинэчилсэн найруулгыг баталлаа.
-Хөгжлийн бэрхшээлтэй хүний эрхийн тухай хуулийг хэрэгжүүлэх зарим арга хэмжээний тухай УИХ-ын тогтоолыг батлууллаа.
-“Ахмад настны тухай”, “Алдар цолтон, ахмад настанд төрөөс нэмэгдэл, хөнгөлөлт олгох тухай” хуулиудын шинэчилсэн найруулгын төслийг хэлэлцүүлэн батлуулсан байна.
Мөн 2018-2020 онд Боловсрол, Соёл, Шинжлэх ухааны сайдаар ажиллаж байхдаа боловсролын салбарт олон жил хүлээгдсэн томоохон шинэчлэлийг хийж хэрэгжүүлсэн билээ. Тухайлбал,
- Багш нарын цалинг нэмэгдүүлсэн.
- Хүүхэд харах үйлчилгээний эрх зүйн орчныг бүрдүүлсэн.
- Эрүүл мэндийн хичээлийг ебс-ийн сургалтын хөтөлбөрт оруулах шийдвэр гаргав.
- Тусгай хэрэгцээт боловсролд чиглэсэн цогц бодлого хэрэгжүүлж эхэллээ.
- Элсэлтийн ерөнхий шалгалтыг шууд засах технологийг нэвтрүүллээ
- Хөгжлийн бэрхшээлтэй хүүхдэд зориулсан боловсролын хөтөлбөр батлан хэрэгжүүлж эхэллээ
- Оюутнууд санхүүгийн дарамтгүй суралцах бололцоог бүрдүүлэв.
- Соёл урлагийн салбарын албан тушаалын ангилал, зэрэглэлийг шинэчлэн батлуулж, цалинг 8-36% нэмэгдүүллээ.
- Соёл, урлагийн байгууллагуудын давсан орлогыг өөрт нь үлдээдэг болгов.
