Гадаад харилцаанаасаа 12 тэрбум төгрөг “харамлажээ”
2025 оны төсвийг УИХ хэлэлцэж байна. Өнөөдөр нийт УИХ-ын 8 байнгын хороод хуралдаж, төсвийн хоёр дахь хэлэлцүүлгийг хийж байна. Аюулгүй байдал, гадаад бодлогын байнгын хорооны хуралдаан дээр ГХЯ-ны төсвийг байнгын хорооны гишүүд хөндлөө.
Манай улсаас гадаад оронд суугаа дипломат ажилчдын цалин хөлс олон улсын жишгээс даруй 40 хувиар доогуур, мөн Гадаад харилцааны яамны хүний нөөц дутагдалтай байдаг тул ирэх жилийн төсөв дээр хүний нөөцийг 40 хувиар нэмэгдүүлэхээр тооцож төсөвт суулгажээ. Ингэснээр нэг хүн дээр үүсээд байгаа ажлын хэт ачаалал, давхардалтыг багасгах боломжтой гэж үзжээ. Түүнчлэн жил бүр төсөвт заавал суулгаж өгөх ёстой нэг зардал бол Элчин сайдын яамдын байрны засвар, үйлчилгээ. Ирэх жилийн тухайд энэ зардалд 12 тэрбум төгрөгийг суулгасныг төсвийн таналтаар хасаж орхижээ. Өөрөөр хэлбэл ирэх жил нэг ч Элчин сайдын яаманд засвар хийх боломжгүй болж байна гэсэн үг.
Хуралдааны үеэр УИХ-ын гишүүн, ГХ-ны сайд Б.Батцэцэг “Зарим газар үл хөдлөх худалдаж авах зайлшгүй шаардлага байгаа. Япон улсад байгаа Элчин сайдын яамны тухайд бол газар хөдлөлтөд тэсвэргүй гэсэн дүгнэлтийг айлын талаас гаргаж, байшингаа зас гэсэн шаардлага тавьдаг. Өртөг өндөр байдаг учраас жижиг засвар хийгээд нэмэргүй болсон. Эсвэл буулгаж шинээр барих, нэг бол байрлал ашигтай байгаа тул газартай хамт худалдан борлуулж шинэ газар байшин худалдаж авах гэсэн хоёр сонголт л байна. Энэ жилийн төсвийн тухайд бидэнд 15-20 сая долларын зардал гаргах тооцоо хийсэн учраас Япон Улсын Элчин сайдын яамны барилгыг засах төсвийг харамсалтай нь тавиулж чадаагүй. Энэ нь боломж бололцоо муу байгаа гэж ойлгоод байна. Бусад газрын тухайд элчин сайдын яамдуудад засвар хийхдээ хуваарийн дагуу хийдэг. Энэ жил бид 12 тэрбум төгрөг тавьсан байсан ч тэр төсөв маань харамсалтай нь хасагдсан гэлээ.
Уг нь манайх шиг хөгжиж байгаа улс орны тухайд гадаад харилцааны салбар гэдэг бол нэн чухал салбар байлтай. Гэтэл энэ салбарт ажиллаж байгаа хэдэн “бор” дипломатчид нь дутуу гуцуу цалин хөлстэй, нурж унах шахсан байранд ажиллаж байгаа нь улс орны нүүр царай гэдэг утгаараа анхаарч үзэх ёстой асуудал баймаар.
