•  2024-12-25 09:00
•  6 мин унших

Чуулганы танхимд тоотойхон үзэгддэг, улсын төсөв хэлэлцэж байхад нэг ч удаа бараагаа  харуулаагүй Х.Баттулга гишүүн өчигдөр гэнэт Төрийн ордонд морилов. Засгийн газраас мега төслүүдийг хөдөлгөж эхлэхээр зэхэж буй эгзэгтэй цаг үеийг хэлэх үү, мега төсөл бүхнийг гацаагч экс Ерөнхийлөгчийг хэвлэлийнхэн барьж авч, ам асуусан нь өчигдрийн гол сэдэв байлаа. Мань "хулгар" зангаа хэрхэн тавих билээ, сэтгүүлчдийн асуултад бултаж булзааруулсан, бантаж гүрийсэн, мушгиж мугуйдласан хариулт өгөв. Түүнийхээр төмөр зам хэрэв нарийн царигтай байсан бол бид  байгалийн баялгаа газар нутагтайгаа хятадуудад 100 жилээр алдах байсныг бид зогсоосон. Цаашдаа ч зогсооно. Өнөөдөр гадаад ажиллах хүчин гэж юм орж ирж байна. Үүний эсрэг мөн би тууштай зогсоно, МоАХ ч тууштай зогсоно” хэмээн бахархалтайяа мэдэгдсэн нь энэ хүний Монголд Улсад учруулах хор, хохирол дуусаагүй гэсэн үг болж таарч байгаа юм.

Тэрээр гэнэт гишүүн гэдгээ санаж ордонд морилсон нь ч учиртай. Өнгөрөгч Баасан гаригт Ерөнхий сайд Л.Оюун-Эрдэнэ мега төслүүдийн эхэнд эрэмбэлэгдсэн Гашуунсухайт, Ганцмодны боомтын хил холболтын төсөл буюу "Чайна Энержи"-гийн гэрээний төслийг УИХ-аар оруулах гэж буйгаа мэдэгдсэн. Үүнтэй зэрэгцэн ордон дотор манай "хулгар хулгай" морилж, ордны гадаа жагсаал болсныг хэвлэлүүд чухамдаа "Женко" Х.Баттулга Монголын хөгжил бүрийг гацаах, хорлох  ээлжит өдөөн хатгалга гэж хардсан нь Женко Монголд ашигтай гэсэн томоохон төсөл бүрийг жадлан эсэргүүцэж, ширлэн гацааж ирсэн Кремлийн төсөл, Оросын БЭТ гэдгийг хэвлэлийнхэн төдийгүй олон нийт мэддэг болсны илрэл юм.

Салбарын сайдаас төрийн тэргүүн болтлоо дэвшиж дээшилсэн он жилүүддээ женко Х.Баттулгын хийсэн хамгийн том ажил бол мухар төмөр зам. Тавантолгойгоос Гашуунсухайтын боомт хүртэлх мухар төмөр замын нийт урт 233,6 км. Тус төмөр замын нийт өртөг нь тамтагаа алдсан. Эхлээд “Энержи Ресурс” концессын гэрээгээр нарийн царигаар барьж байгуулах тохироотой байсан ч дундаа хэдэн ч удаа эргэж буцаж, жонхуу хутгалдсаныг бид өмнөх нийтлэлдээ тодорхой дурдсан. Эцэстээ “Бодь” групп, Д.Баясгалан барьж 2022 онд ашиглалтад оруулсан. Сүр бараатай тууз хайчилсан уг төмөр зам харамсалтай нь өргөн царигаасаа болж хил давж Хятадын төмөр замтай холбогдож чадаагүй. Тиймдээ ч овоолсон шороо нэр авсан билээ. Товчхондоо өргөн царигийн мухар төмөр замаас болж Монгол Улсын алдагдсан боломж жилд 2,3 тэрбум ам.доллар, 10 жилийн хугацаагаар тооцож үзвэл 23 тэрбум ам.доллар гэсэн тооцоолол бий.

ЖЕНКО БА 40 ТАНКЧИН

2014 онд Засгийн газрын тогтоол гарч, Тавантолгойн уурхайд хөрөнгө оруулах, олборлолтыг нэмэгдүүлэх, Тавантолгой-Гашуунсухайт чиглэлийн төмөр зам, уул уурхайн хөрөнгө оруулалтыг цогцоор нь шийдэхээр болж, Мега төсөл хариуцсан сайд М.Энхсайханы ахалсан ажлын хэсэг хэлэлцээрийн ширээний ард суусан ч УИХ-ын нэр бүхий 40 гишүүн санал гаргаснаар уг ажил зогссон. Улсаа хорлох шийдвэрт гарын үсэг зурж, кноп дарсан 40 гишүүний нэр даравч дардайж, булавч бултайсаар, парламентын түүхэнд хар толбо болон үлджээ.

• Л.Эрдэнэчимэг
• Р.Амаржаргал
• Д.Арвин
• О.Баасанхүү
• Ж.Батзандан
• Х.Баттулга
• Ц.Баярсайхан
• Г.Баярсайхан
• Б.Болор
• Х.Болорчулуун
• Р.Бурмаа
• С.Ганбаатар
• Д.Ганбат
• Д.Ганхуяг
• Б.Гарамгайбаатар
• Ц.Даваасүрэн
• С.Дэмбэрэл
• М.Зоригт
• С.Одонтуяа
• Ц.Оюунбаатар
• М.Сономпил
• А.Тлейхан
• Д.Сумъяабазар
• Д.Тэрбишдагва
• Ч.Улаан
• Г.Уянга
• Ш.Түвдэндорж
• Л.Цог
• Б.Чойжилсүрэн
• З.Энхболд
• С.Эрдэнэ
• З.Баянсэлэнгэ
• Ж.Батсуурь
• Д.Сарангэрэл
• Д.Бат-Эрдэнэ
• Ц.Цолмон
• Н.Алтанхуяг
• А.Бакей
• Н.Батбаяр
• Л.Болд
• Р.Гончигдорж
• Б.Наранхүү
• Я.Санжмятав
• Д.Бат-Эрдэнэ

Дээрх танкчдаас женко Х.Баттулга, босоо С.Ганбаатар, бидон хочит Д.Ганбат, аваадсурсан Ц.Даваасүрэн, Эрчим хүчний сайд болж дэвшсэн Б.Чойжилсүрэн, задгай цагаан Н.Алтанхуяг нарын улсаа хорлогчид ахин гишүүн болж, төрд залран байна.

“Чайна Энержи”-гийн хэлэлцээр УИХ-аар орох гэж энэ өдрүүдэд дээрх танкчдаас айж, сэрэмжилбэл зүйтэй юм. Эд тухайн үедээ Засгаа огцруулна гэж бойкот хийснээс төмөр замыг нарийн царигаар барих төсөл гацсан түүхтэй.   

ХӨДӨЛМӨРИЙН БААТАР Х.УДААНЖАРГАЛЫН ЭХ ОРОНДОО УЧРУУЛСАН ХОХИРОЛ 

Дээрх нэр бүхий танкчид дээр нэмээд өдгөө "шувуу" болж эх орноосоо дайжсан Х.Удаанжаргалын эх орондоо учруулсан гайг бид мартаж болохгүй. Тэрээр нарийн царигийн төмөр замыг ахин босож ирэхгүй болтол нь "нокаут"-нд хийсэн сүүчийн "Могикан". Тодруулбал, 2020 онд Х.Удаанжаргал ҮХЦ-д хандаж гомдол гаргаснаар дээрх төмөр замын маргаан эцсийн цэгээ хатгаж, өргөн царигаар баригдахаар болсон түүхтэй.

Энэ үедээ Х.Удаанжаргал “Тавантолгой төмөр зам” ХХК-ийн Гүйцэтгэх захирлаар ажиллаж байсан бөгөөд төмөр замыг нарийн царигаар барих шийдвэрийг хүчингүй болгуулсныхаа дараа жил Х.Баттулгаас Хөдөлмөрийн баатар цол хүртсэн нь хоржоонтой. Өдгөө тэрээр эх орноосоо оргон зайлж, “Шувуу” ажиллагааны хүрээнд интерполоор эрэн сурвалжлагдаж буй.