"Эрүү шүүлтээс урьдчилан сэргийлэхэд иргэний нийгмийн оролцоо" уулзалт, хэлэлцүүлэг боллоо

УИХ-ын Хууль зүйн байнгын хороо, УИХ-ын Хүний эрхийн дэд хороо, Эрүү шүүлтээс урьдчилан сэргийлэх үндэсний ажиллагаа хамтран "Эрүү шүүлтээс урьдчилан сэргийлэхэд иргэний нийгмийн оролцоо" уулзалт, хэлэлцүүлгийг зохион байгуулав. Уулзалт, хэлэлцүүлэгт УИХ-ын гишүүн, Хууль зүйн байнгын хорооны дарга Д.Цогтбаатар, УИХ-ын гишүүн, Хүний эрхийн дэд хорооны дарга С.Эрдэнэболд болон хүний эрхийн чиглэлээр үйл ажиллагаа явуулдаг Иргэний нийгмийн байгууллагуудын төлөөлөл болох Эрүүдэн шүүх, хэлмэгдүүлэлтэй тэмцэх үндэсний холбоо, “Иргэдийн шударга шүүх” ТББ, “Сэтгэлзүйн мэдрэмж” ТББ, ХЭҮК-ын дэргэдэх Иргэний нийгмийн зөвлөл, ХЭҮК-ын Хүний эрх хамгаалагчийн хороо, Монголын Хуульчдын холбоо, Монголын Өмгөөлөгчдийн холбоо, Монголын Криминологичдын холбоо, ЛГБТ Төв, “Эмнести Интернэшнл” олон улсын байгууллагуудын төлөөлөл оролцлоо.

Мөн Эрүү шүүлтээс урьдчилан сэргийлэх асуудал эрхэлсэн гишүүн Я.Цэлмэн “Эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж шийтгэхийн эсрэг конвенцын хэрэгжилтийн Монгол Улсын 3 дахь илтгэлийг хэлэлцээд Монгол Улсын Засгийн газарт ирүүлсэн Нэгдсэн Үндэстний Байгууллагын Эрүүдэн шүүхийн эсрэг хорооны дүгнэлт, зөвлөмж”-ийг Иргэний нийгмийн байгууллагуудад танилцуулав.

Цаашид иргэний нийгмийн байгууллагуудтай Монгол Улсын иргэн, гадаадын иргэн, харьяалалгүй хүн, хэн бүгдийн эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж шийтгэх, ялгаварлан гадуурхалтаас ангид байх эрхийг хамгаалах, дэмжих, зөрчигдсөн эрхийг нөхөн сэргээх, хүний эрхийн тухай бүх нийтийн боловсролыг дээшлүүлэх, төрийн албан хаагч, иргэдийн харилцаанд хүний эрхэд суурилсан хандлагыг төлөвшүүлэхэд хамтран ажиллахаа илэрхийлж, хамтын ажиллагааны төлөвлөгөөг хэлэлцэн баталж, талууд гарын үсэг зурлаа. Мөн “Эрүү шүүлтгүй Монголын төлөө” уриа дор төрийн байгууллагуудад уриалга гаргахаар тогтлоо.