Батлах хамгаалахын сайд С.Бямбацогт гянтболдын хулгайн хэргээ тусгаарлуулжээ
Зохион байгуулалттай гэмт бүлэглэл хуйвалдаж, Улсын тусгай хамгаалалттай газраас хууль бусаар гянтболд олборлосон Эрүүгийн хэргээс УИХ-ын гишүүн С.Бямбацогт өөрийгөө "сугалж" үлдсэн баримт энд байна. 2016- 2018 онд төрийн албан тушаалтнууд урьдчилан нэгдэж, гэмт хэргийн зохион байгуулалтад орж, Ховд аймгийн Цэцэг сумын улсын тусгай хамгаалалтай Мянган угалзатын нуруунд 27.27 га газарт хууль зөрчин 542,95 тн гянтболд олборлосон . Дээрх 3 жилийн хугацаанд: -2016 онд 226,23 тн гянтболд буюу 4,8 тэрбум төгрөг - 2017 онд 180,98 тн гянтболд буюу 6,9 тэрбум төгрөг - 2018 онд 135,74 тн гянтболд буюу 5,6 тэрбум төгрөг нийт 17.3 тэрбум төгрөгийн гянтболд /Вольфрам/ олборлож, байгаль орчинд 2,6 тэрбум төгрөгийн хохирол учруулсан.
Нинжа нараар сүйтгүүлж байгаад дараа нь нөхөн сэргээлт хийх нэрээр , "Өгөөжтэй өв" ХХК хэмээх мэргэжлийн байгууллагын эрхийг ашиглаж 3 жил цагдаагаар хамгаалуулж, ямар ч хяналт шалгалт оруулахгүйгүйгээр вольфрам олборложээ. Улсын тусгай хамгаалалтай газарт явуулж буй хууль бус ажиллагааг нь хянаж таслан зогсоох үүрэгтэй Байгаль орчны яам, Цагдаагийн байгууллага, Мэргэжлийн хяналт зэрэг төрийн албан хаагчид асар их авлига авсан нь тогтоогдсон. Үүнд: УИХ-ын гишүүн, Байгаль орчны яам, Ховд аймгийн Засаг дарга, аймгийн Цагдаагийн дарга, Мэргэжлийн хяналтын газар Цэцэг сумын ИТХ-ын дарга, багийн дарга, Мянган угалзатын байгалийн цогцолборт газрын хамгаалалтын захиргааны дарга гэх мэт бүгд дансаараа авлига авсан байдаг.
Нийт 55 удаагийн үйлдлээр 13 нэр бүхий төрийн албан хаагчид 182,9 сая төгрөгийн хахууль авсан. Хууль зөрчин олборлосон гянтболд буюу гэмт хэргийн улмаас олсон хөрөнгө гэдгийг мэдсээр байж, түүний хууль бус эх үүсвэрийг нуун далдлах зорилгоор Ховд аймгийн Цэцэг сумаас Улаанбаатар руу тээвэрлэж, Төв аймгийн Эрдэнэ суманд цагаан тугалга олборлох А зөвшөөрөлтэй “Олава”, “Принципал инвестмейнтс” ХХК -аар дамжуулан Замын-Үүд боомтоор гаалийн бүрдүүлэлт хийж, БНХАУ руу экспортолж олсон 16 тэрбум төгрөгийг Хятад, Монгол 19 хүний дансаар авсан. Хууль бус эх үүсвэрийг нь өөрчилж, хуулийн хариуцлагаас зугтсан учраас мөнгө угаах гэмт хэрэг ч гэж үзэх боломжтой. Нийт 30-аад хүн оролцсон зохион байгуулалттай гэмт бүлэглэлийг шүүх ажиллагаа 7 жилийн турш шийдэгдсэнгүй.
Яг энэ өдрүүдэд шүүх хурал нь СХД, ХУД, БГД-ийн Эрүүгийн хэргийн шүүхэд үргэлжилж байна. Хамгийн сонирхолтой нь дээрхи хэргээс УИХ-ын гишүүн С. Бямбацогт, Ховд аймгийн Засаг дарга асан Д.Галсантогтох болон Цагдаагийн дарга нар өөрт холбогдох хэргээ тусгаарлуулж, эрх мэдэл, мөнгөгүй хэд нь үлдэж хэргээ шүүлгэж байна. Хуулийн өмнө хүн бүр эрх тэгш байх Үндсэн хуулийн заалт хэрэгждэггүйн бодит жишээ цагаан дээр хараар байгаа нь энэ.
Эх сурвалж: Сэтгүүлч Б. Отгон
