Аж Үйлдвэр, эрдэс баялагийн сайд Ц.Туваан: Оюутолгой ХХК-ийн татварын маргаантай асуудлыг УИХ-аар хэлэлцэнэ
УИХ-ын 103-р тогтоолыг хэрэгжилтийг хангах ажлын хэсэг Оюутолгой ХХК-тай холбоотой татварын маргааны асуудлыг эцэслэн шийдэхээр ажиллаж буй. Тэгвэл энэ хүрээнд Оюутолгойн бүлэг орд газарт хамаарах Шивээ толгой, Жавхлантын орд газрыг ашиглах асуудал хөндөгдөөд байна. Энэ талаар Аж үйлдвэр, эрдэс баялгийн сайдаас тодрууллаа.
- Оюутолгойн татварын өртэй холбоотой асуудлаар Засгийн газрын зүгээс баримталж байгаа байр суурь ямар байгаа вэ?
- Оюутолгой ХХК-тай хоёр асуудал яригдаж байна.
- “Онтре гоулд” ХХК-ийн тусгай зөвшөөрөлтэй холбоотой асуудал,
- Татварын маргаантай холбоотой асуудал хөндөгдөж байгаа.
Татварын маргаантай холбоотой асуудлаар өмнөх УИХ-ын 103-р тогтоолын хэрэгжилтийг хангах ажлын хэсгийг миний бие ахлаж байгаа.
Арбитрын маргаантай холбоотой асуудлыг ХЗДХ-ийн сайд О.Алтангэрэл ахлаж байгаа. Оюутолгой ХХК-ийн Зэсийн группын гүйцэтгэх захирал ирж байгаа. Өнөөдрөөс эхлэн албан уулзалтууд хийгээд явна. Мэдээж татвартай холбоотой болон тусгай зөвшөөрөлтэй холбоотой асуудлууд хуульд өөрчлөлт оруулах замаар буюу УИХ-аар шийдэгдэх магадлал өндөр байгаа.
Тусгай зөвшөөрөлтэй холбоотой асуудлаар бол “Онтре Гоулд ХХК-ийн эзэмшиж байгаа орд газар нь Оюутолгойн бүлэг ордын хэмжээнд хамаардаг. Тэгэхээр энэ асуудал дээр Стратегийн орд газрын хил, хязгаарыг тогтоох асуудал, хил хязгаар тогтоосонтой холбоотойгоор “Онтре гоулд” ХХК орд газрыг ашиглахад Үндсэн хуульд хэрхэн нийцүүлэх, Баялгийн сангийн хуулийг яаж мөрдөх вэ гэх мэт дараалсан асуудлууд хүлээгдэж байна. Уулзалтууд хийгдээд санал солилцоод явахад асуудал нэлээн тодорхой болно.
Дашрамд дуулгахад Оюутолгойн бүлэг орд газарт хамаарч байгаа Шивээ толгой, Жавхлантын орд газрын ашиглалтын тусгай зөвшөөрлийг “Онтре гоулд” ХХК эзэмшдэг байна. Тус орд газруудын нөөц нь дараах байдлаар тогтоогдсон байна.
Шивээ толгойн орд газар нь:
- Зэс -3.49 сая тонн,
- Алт -108 тонн, Мөнгө - 882 тонн нөөцтэй.
Жавхлантын орд газар нь:
- Зэс - 5.29 сая тонн,
- Алт - 568 тонн,
- Молибден – 157 мянган тонн,
- Мөнгө – 1.959 тонн нөөцтэй гэж тогтоогджээ.
