Хотын даргаа хотын соёлд сургамаар байна
Дийлдэхгүй хэрүүлч, бүр намайг хэн хэлж, нохой хэн саахав гэдэг хотын даргатай боллоо доо. Гудамжинд иргэнээ загнаад явдаг байсан одоо эрхэм гишүүд рүү, өмнө хойдыг нь дуудаж, элдвээр доромжлох нь энүүхэнд болов. Шүүмж хэлсэн болгоныг ингэж ноцоод байх өөрт нь ч хэцүү баймаар юм.
УИХ-ын гишүүн Б. Жаргалан, Л.Мөнхбаясгалан нартай хийсэн хэрүүл нь өнгөрсөн долоо хоногийн нийгмийн сүлжээнд “амт оруулав” Хот гэдэг вант улстай боллоо гэж хэлээд төсөв мөнгөний талаар шүүмжилсэн УИХ-ын гишүүн Б.Жаргаланг поопорлоо, галзуураад байгаарай гэж загнасан бол УИХ-ын гишүүн Л.Мөнхбаясгаланг “гишгэсэн зам нь худал, удам судар нь худал” гэх зэргээр доромжилжээ. Ямар ч мэргэн цэцэн, ой санамж ч сайтай юм. Аа тийм, дайрч доромжилсон улс нь дандаа эмэгтэйчүүд шүү. Эрийн муу эмд гэдэг байх аа.
Улс орнуудын нэг бахархал нийслэл хот нь байдаг. Бид бүгд л мэддэг. Нийслэлээрээ овоглож, нэрийн хуудас болгодог улсууд ч бий. Нийслэл хотуудын дарга, захирагч нар нь ихэнхдээ нэр төртэй, өндөр боловсролтой, ёстой нөгөө удам угсаа, гарал үүслээрээ гайхагдсан, төгссөн сургууль, эзэмшсэн мэргэжлээрээ хүлээн зөвшөөрөгдсөн эрхэмүүд байх нь олонтаа. Иргэдийнхээ дундаас сонгогддог.
Гэтэл манай даргын хэл ам нь гүйцэгдэхгүй. Бас нам томилдог. МАН энэ хүндээ хэлж зөвөлсөн нь дээр байх аа. Тэгэхгүй бол “Зууны манлай” хэрүүлч хотын даргаар түүхээ бичүүлэх нь ээ. Хотын даргадаа жаахан номын дуу сонсгож, хотын соёлд сургамаар байна. Төгссөн сургууль соёл нь юу билээ. Их, дээд сургуульд сурч, боловсрол эзэмших энтэр чинь их учиртай л даа. Номыг нь сурдаггүй юм гэхэд ногоотой шөлийг нь иднэ гэж үг байдаг. Тэнд соёл, харилцаа, биеэ авч явах чадвар, хандлага, хэзээ дуугарч, хэзээ татах бүгдийг суулгаж, төлөвшүүлдэг учиртай. Манай Х.Нямбаатар даргад ногоотой шөл идсэн шинж ер байна уу. Ном багатай хүний дуу чанга байдаг.
