Боловсролын яамны Төрийн нарийн бичгийн даргаар Т.Ням-Очир яригдаж байна

Есөн сарын настай Г.Занданшатарын Засгийн газар огцорч Н.Учрал Ерөнхий сайд болсноор өмнөх Засгийн газрын бүтцэд 8 сайд шинээр, давхардсан тоогоор 11 яамны сайд өөрчлөгдсөн. Тэдний нэг нь Боловсролын сайд П.Наранбаяр огцорч оронд нь УИХ-ын гишүүн Л.Энх-Амгалан тус яамны сайдаар томилогдоод байгаа. Түүний тухайд Л.Оюун-Эрдэнийн кабинетэд Боловсролын сайдаар 3 жил ажилласан туршлагатай учраас салбар нь ч таатай хүлээж авсны зэрэгцээ багш нарын цалингийн нэмэгдэл зэрэг шийдлээ хүлээсэн олон асуудлыг шийднэ гэдэг өндөр хүлээлттэй байгаа.

Өмнөх сайд П.Наранбаярын тухайд ХҮН-ын гишүүн. Л.Энх-Амгалан сайд МАН-ын гишүүн учраас үүнийг дагаад Төрийн нарийн бичгийн даргаас авахуулаад хэвлэлийн төлөөлөгч хүртэл томилгоо хийгдэх нь тодорхой.

Т.Ням-Очирын тухайд Химийн багш мэргэжилтэй бөгөөд 

- 2002-2003 онд Ховд аймгийн 10 жилийн 3 дугаар дунд сургуульд Химийн багш,

- 2003-2004 онд Нийслэлийн Хүүхэд залуучуудын хөгжлийн газрын Бодлогын хэлтсийн залуучуудын хөгжлийн асуудал хариуцсан мэргэжилтэн, дотоод ажил хариуцсан мэргэжилтэн - 2005-2008 онд Сүхбаатар дүүргийн Засаг даргын Тамгын газрын Нийгмийн хөгжлийн хэлтсийн боловсролын асуудал хариуцсан мэргэжилтэн,

- 2008-2011 онд нийслэлийн Сүхбаатар дүүргийн Засаг даргын дэргэдэх Боловсролын хэлтсийн ахлах мэргэжилтэн,

- 2011-2012 онд Нийслэлийн Боловсролын газарт Хяналт-шинжилгээ, үнэлгээний албаны дарга, газрын дарга,

- 2012-2017 онд Чингэлтэй дүүргийн Боловсролын хэлтсийн дарга,

- 2018 оноос Боловсрол, шинжлэх ухааны яамны Ерөнхий боловсролын бодлогын хэрэгжилтийг зохицуулах газрын дарга,

- 2022 оноос Боловсролын ерөнхий газрын даргаар өнөөдрийг хүртэл ажиллаж буй төрийн жинхэнэ албан хаагч.Товчхондоо боловсролын салбарт мерит зарчмаар дэвшин ажиллаж буй цэвэр мэргэжлийн хүн аж.