Apple-ийн iPhone 18 Pro загварын нууц задарчээ

"Reuters" агентлагийн мэдээлснээр, Apple компанийн Энэтхэг дэх гол нийлүүлэгч Tata Electronics компани барьцаалагч программ (ransomware)-ийн халдлагад өртөж, үүний улмаас удахгүй худалдаанд гарах iPhone 18 Pro загварын эд анги, нийлүүлэгчдийн нууц жагсаалт болон утасны бодит зургууд дарк вэб (dark web)-д нийтлэгдсэн байна.

Энэхүү мэдээлэл задарсан явдал нь Apple-ийн дэлхий даяарх маш нарийн нууцлалтай нийлүүлэгчдийн сүлжээ болон бизнесийн үйл ажиллагаанд томоохон заналхийлэл учруулж эхэллээ.

Apple компани нийлүүлэгчидтэй хийдэг гэрээ хэлэлцээр, бүтээгдэхүүнийхээ эд ангиудын эх сурвалжийг маш чанд нууцалдаг тул энэхүү мэдээлэл ил болсноор Apple болон Tata хоорондын харилцаанд сэв сууж болзошгүй юм. Мөн өрсөлдөгчид, хуурамч бүтээгдэхүүн үйлдвэрлэгчид болон зах зээлийн бусад тоглогчдод Apple-ийн дотоод нарийн бүтцийг харах боломжийг олгож байна.

Гэрээт үйлдвэрлэгчийн хувьд эд анги нийлүүлж, iPhone-ийг угсардаг Tata Electronics нь Хятадаас гаднах Apple-ийн хамгийн чухал үйлдвэрлэлийн түншүүдийн нэг болон гарч ирж байгаа бөгөөд энэхүү өргөжилт нь Энэтхэг улсыг электроник үйлдвэрлэлийн хүчирхэг гүрэн болгох Ерөнхий сайд Нарендра Модигийн бодлогын тулгуур чулуу юм. Apple компани iPhone 18 Pro болон Pro Max загваруудаа 9-р сард худалдаанд гаргахаар төлөвлөж байгаа гэх мэдээлэл байна.

Энэхүү мэдээлэл алдагдсан явдал нь Apple-ийн хувьд хүндхэн цаг үед тохиож байна. Санах ой болон хадгалах чипийн үнэ огцом өссөнөөс шалтгаалан өнгөрсөн долоо хоногт тус компани iPad болон MacBook-ийн үнээ нэмсэн бөгөөд шинжээчид Apple-ийг ойрын саруудад iPhone-ийн үнээ ч мөн өсгөнө гэж таамаглаж байна.

Алдагдсан баримт бичгүүдийн нарийвчилсан бүтэц:

"World Leaks" бүлэглэл Tata Electronics-ийн 200,000 гаруй файлыг дарк вэбэд дэлгэсэн бөгөөд тэдгээр файл дунд дараах чухал баримтууд багтжээ:

• iPhone 18 Pro загварын эд ангиуд: Үндсэн хэлхээний самбар дээрх чипүүд, батерей болон камерын эд ангиудын нарийвчилсан мэдээлэл бүхий дор хаяж зургаан файл.
• Нийлүүлэгчдийн холбоос: Олон зуун эд ангийг яг аль компани нийлүүлдэг болохыг харуулсан урьд өмнө нь хэзээ ч ил болж байгаагүй мэдээллийн сан.
• Бусад технологийн аваргуудын мэдээлэл: Apple-ийн хуучин iPhone-уудын эд ангийн дизайн, Tesla-ийн зарим эд ангийн мэдээлэл, мөн Taiwan Semiconductor Manufacturing Co (TSMC) болон Qualcomm компаниудын баримт бичгүүд.
• Бодит зургууд: Tata-ийн үйлдвэрүүдийн нэг дээр уналтын туршилт хийж буй iPhone 18 Pro загварын зургууд (2026 оны эхээр гэж огноологдсон).

Уг асуудлыг сайн мэдэх эх сурвалжийн мэдээлснээр, эдгээр нь хараахан худалдаанд гараагүй загваруудтай холбоотой тул Apple энэхүү нарийвчилсан мэдээллийг маш эмзэгт тооцож, баримт бичгүүд дарк вэбээр тархаж байгаад санаа зовж байгаа аж. Уг өгөгдөл нь iPhone-ийн эд ангиудыг нийлүүлэгчидтэй нь уялдуулан харуулсан бөгөөд Apple үүнийг нийлүүлэгчдийнхээ олон нийтэд нээлттэй мэдээллийн санд дэлгэдэггүй болохыг уг эх сурвалж нэмж хэлэв.

Мөн уг бүртгэлээс Apple аль эд ангийг хэд хэдэн нийлүүлэгчээс авдаг, мөн аль эд анги дээр цөөн хэдэн компаниас хамааралтай байдаг нь харагдах бөгөөд энэ нь тус компанийн үнэ тохиролцох давуу тал болон эмзэг сул талыг аль алиныг нь илчилж байгаа юм. Эх сурвалжийн мэдээлснээр, алдагдсан файлуудын зарим нь Apple-ийн "confidential" (нууц) гэсэн усан тамга болон iPhone 18 Pro үеийнхтэй тохирох Apple-ийн дотоод код нэртэй байжээ.

iPhone 18 Pro файлуудын хавтас дотор Tata-ийн үйлдвэрүүдийн нэг дээр уналтын туршилт хийж буй iPhone-уудын зургууд байсан бөгөөд 2026 оны эхээр гэж огноологдсон байв. Тэдгээр зурагт уламжлалт хавтан хэлбэртэй, ар талдаа гурван камертай, Apple-ийн лого бүхий саарал өнгийн гар утсыг дүрсэлсэн байжээ. Reuters уг утасны загварын дугаарыг баттай тодорхойлж чадаагүй боловч эдгээр нь iPhone 18 Pro загварын зургууд мөн болохыг эх сурвалж баталсан байна.

Apple уг асуудлыг шалгаж байгаа бөгөөд Tata-тай хамтран урт хугацааны арга хэмжээ авахаар ажиллаж байгааг Reuters өмнө нь мэдээлсэн. Tata компани мэдээлэл алдагдсан хэргийг шалгах хугацаанд дотоодын эмзэг системүүд рүү нэвтрэх эрхийг хязгаарлаж, шүүх шинжилгээний аудит хийлгэхээр олон улсын зөвлөх үйлчилгээний компанийг хөлсөлсөн байна.

Эх сурвалж: reuters.com