Дэлхийн аварга шалгаруулах тэмцээний сонирхолтой тоо баримтууд

2026 оны хөлбөмбөгийн Дэлхийн аварга шалгаруулах тэмцээн сонирхолтой үйл явдал,  шинэ дээд амжилт болон гэнэтийн тоо баримтуудаар дүүрэн үргэлжилж байна. Ройтерс агентлагийн хийсэн нарийвчилсан дүн шинжилгээгээр энэ удаагийн тэмцээнд тоглолтын төгсгөлд гоол орох магадлал нэмэгдэж, багуудын бүрэлдэхүүн дэх гадаадад төрсөн тоглогчдын тоо түүхэн хэмжээнд хүрч, талбайн аюулгүй байдал болон тоглогчдын өмсгөл хүртэл шинэ өнгө төрхтэй болсныг харууллаа.

Сүүлчийн минутын гоолууд ба цаг агаарын аюулгүй байдал

ДАШТ-ий тоглолтууд урьд өмнөхөөсөө илүү урт хугацаанд үргэлжилж, шүүгчийн мэдлийн нэмэлт цагт гоол орох магадлал улам бүр нэмэгдсээр байна. Энэхүү хандлага 2018 оны ДАШТ-ээс эхлэн эрчимжиж, 2022 оны Катарын тэмцээнд дээд цэгтээ хүрсэн бол 2026 оны тэмцээнд ч үргэлжилсээр байна. Долоодугаар сарын 2-ны байдлаар тоглолтын хоёрдугаар хагасын нэмэлт цагт дунджаар 0.26 гоол орсон нь 2022 оны үзүүлэлтээс давсан байна.

Нөгөөтэйгүүр, АНУ-д явагдаж буй тоглолтууд аянга цахилгааны аюулгүй байдлын хатуу дүрмийн дор зохион байгуулагдаж байна. Цэнгэлдэх хүрээлэнгээс 13 км-ийн зайд аянга илэрсэн тохиолдолд тоглолтыг шууд зогсоож, аянга цахиснаас хойш 30 минутын турш дахин цахилгаан цахихгүй болтол тоглолтыг сэргээхгүй байх журам үйлчилж байна. Аянга цахилгааны аюул нь зөвхөн шууд цохилтоор хязгаарлагдахгүй бөгөөд хөрсний гүйдэл, хажуугийн оч зэрэг олон хэлбэрээр хүмүүст аюул учруулдаг тул задгай цэнгэлдэх хүрээлэнгүүдэд үзэгчид болон тоглогчдыг хамгаалах нь хамгийн чухал асуудал болоод байна.

Гадаадад төрсөн тоглогчид ба шинэ багууд

Энэ удаагийн ДАШТ-д оролцож буй багуудын бүрэлдэхүүнийг харахад хөлбөмбөгийн спорт улам бүр даяаршиж байгааг илтгэнэ. Олон тоглогч өөрийн төлөөлж буй улсаас өөр оронд төрсөн байна. Тухайлбал, Кюрасао улсын шигшээ багийн 95 хувь нь Нидерландад төрсөн бол Бүгд Найрамдах Ардчилсан Конго Улсын багийн 85 хувь нь Францад төржээ. Франц улс нь бусад улсын шигшээ багт тоглож буй 73 тоглогчийг "нийлүүлсэн" хамгийн том эх сурвалж орон болоод байгаа бол Нидерланд (42), Герман (25), Англи (23) удаалж байна.

FIFA-гийн дүрмийн дагуу тоглогчид тухайн улсын иргэн байх ёстой бөгөөд эцэг эх, өвөг дээдэс нь тухайн улсад төрсөн эсвэл өөрөө 5-аас доошгүй жил амьдарсан байх шаардлагатай байдаг. Энэхүү боломжийг ашиглан Марокко зэрэг улсууд гадаадад төрсөн шилдэг авьяастнуудыг амжилттай элсүүлж байгаа ч, Кюрасао болон Конго зэрэг багууд хэсгийн шатандаа хүндхэн байдалд байгаа нь зөвхөн диаспора тоглогчдоор багаа бүрдүүлэх нь элит багуудын хэмжээнд хүрэхэд хангалтгүй байгааг харуулж байна.

Ягаан өнгийн "шипи" ба брэндүүдийн өрсөлдөөн

Спортын хувцас үйлдвэрлэгч "Nike" болон "Adidas" брэндүүд талбай дээр ширүүн өрсөлдөж байна. Гарааны 528 тоглогчийн 232 нь Nike, 218 нь Adidas брэндийн бутс өмссөн байна. Гэвч энэ удаагийн тэмцээний хамгийн тод хандлага нь брэнд биш, харин өнгө байлаа. Гарааны тоглогчдын 69 хувь буюу 365 нь тод ягаан өнгийн бутс өмссөн байна. Бразил, Колумби, Германы шигшээ багийн бүх 11 тоглогч ягаан бутстай талбайд гарсан нь багийн зураг дээр маш тод харагдаж байна. Уламжлалт хар өнгийн бутсыг ердөө долоон тоглогч өмссөн байна.

Лионель Мессигийн түүхэн дээд амжилт

Аргентины шигшээ багийн ахлагч Лионель Месси ДАШТ-ий түүхэнд хамгийн олон гоол оруулсан Германы Мирослав Клозегийн амжилтыг эвдэж, 20 гоолтойгоор түүхэн дээд амжилтыг шинэчлэн тогтоолоо. Тэрээр өөрийн зургаа дахь ДАШТ-дээ оролцож байгаа бөгөөд 28 дахь тоглолтоо хийгээд байна. Түүний араас Францын Килиан Мбаппе 19 гоолтойгоор нэхэж байгаа бөгөөд тэрээр өөрийн гурав дахь ДАШТ-дээ оролцож байна.

FIFA-гийн чансаа ба бодит байдал

FIFA-гийн чансаа нь багуудын формын илэрхийлэл боловч ДАШТ-д шалгарах баталгаа болж чаддаггүй. Тухайлбал, дөрвөн удаагийн аварга Итали улс энэ удаагийн тэмцээнийг өнжиж байгаа бөгөөд тэд Босни ба Херцеговины багт торгуулийн цохилтоор ялагдан хасагдсан юм. 

Энэ удаагийн ДАШТ нь 48 багтай өргөтгөсөн форматаар зохион байгуулагдаж байгаа тул Кюрасао, Кабо Верде, Узбекистан, Иордан зэрэг шинэ багууд анх удаа дэлхийн тавцанд хүч үзэх боломж бүрдсэн юм. Тэмцээний нээлтийн ажиллагаа ч мөн түүхэнд анх удаа гурван өөр улсад (Мексик, АНУ, Канад) зэрэг зохион байгуулагдаж, Шакира, Бурна Бой зэрэг дэлхийн хэмжээний 25 гаруй уран бүтээлчид оролцсон нүсэр шоу боллоо.

Эх сурвалж: reuters.com