Газын зурвасыг зэвсэггүй болгох энхийн төлөвлөгөөг танилцууллаа

АНУ-ын Ерөнхийлөгч Дональд Трамп Газын зурваст гал зогсоох, тус бүс нутгийг зэвсэггүй болгох чиглэлээр 15 заалт бүхий шилжилтийн төлөвлөгөөг танилцуулж, талууд хэлэлцээ хийж эхэллээ.

НҮБ-ын Аюулгүйн Зөвлөлийн 2803 дугаар тогтоолын хүрээнд "Энх тайвны зөвлөл"-тэй хамтран боловсруулсан уг замын зураглалд Хамас болон бусад зэвсэгт бүлэглэлийг бүрэн зэвсэг хураах, хүнд зэвсгийн бүртгэл хөтлөх, туннелүүдийг нураах зэрэг шат дараалсан арга хэмжээг тусгажээ. Үүний хариуд Израилийн цэргийн хүчнийг Газын зурвасаас бүрэн гаргахаар төлөвлөсөн байна. Мөн дайны дараах Газын зурвасыг Индонез, Марокко, Казахстан, Косово, Албани зэрэг улсын цэргээс бүрдсэн Олон улсын тогтворжуулах хүчний дэмжлэгтэйгээр, технологийн мэргэжилтнүүдээс бүрдсэн Палестины засаг захиргаанд шилжүүлэхээр тусгажээ.

Хэдийгээр АНУ-ын засаг захиргаа үүнийг боломжит төлөвлөгөө гэж үзэж байгаа ч Газын зурвас дахь бодит нөхцөл байдал дээр талуудын байр суурь зөрүүтэй хэвээр байна. Тухайлбал, Хамас бүлэглэл зэвсэг хураах төлөвлөгөөг зөвшөөрсөн боловч Газын зурвас дахь бусад зэвсэгт фракцын зүгээс хүчтэй эсэргүүцэлтэй тулгарчээ. Нөгөө талаас, Израиль улс уг төлөвлөгөөнд маш их эргэлзэж байгаагаа илэрхийлсэн бөгөөд тус улсын Үндэсний аюулгүй байдлын сайд Итамар Бен-Гвир уг төлөвлөгөөг "хүлээн зөвшөөрөх боломжгүй" хэмээн мэдэгдсэн байна. Үүний зэрэгцээ Палестины засаг захиргааны хэвлэлийн төлөөлөгч Набил Абу Рудейнех наймдугаар сарын 3-ны өдөр хийсэн мэдэгдэлдээ, Газын зурваст гал зогсоох "Хоёрдугаар шатны" хэлэлцээр зөвхөн цаасан дээр үлдсэнийг анхааруулав. Тэрээр амралтын өдрүүдэд Израилийн цохилтын улмаас дор хаяж 28 палестин хүн амь үрэгдсэнийг дурдаад, НҮБ-ын Аюулгүйн Зөвлөлийг гал зогсоох шийдвэрийг яаралтай хэрэгжүүлэхийг шаардсан юм.

Энэхүү эгзэгтэй үед НҮБ-ын Аюулгүйн Зөвлөлийг наймдугаар сард даргалах үүргийг Дани улс хүлээн авлаа. Дани улсаас НҮБ-д суугаа Элчин сайд Кристина Маркус Лассен Ойрхи Дорнод, Судан болон Булангийн бүс нутагт геополитикийн хурцадмал байдал улам нэмэгдэж байгаад гүнээ түгшиж байгаагаа илэрхийлэв. Тэрээр Аюулгүйн Зөвлөлийн наймдугаар сарын төлөвлөгөөнд Сири, Йемений асуудлаас гадна Палестины асуудлыг багтаасан Ойрхи Дорнодын нөхцөл байдлыг хэлэлцэх уулзалтууд тусгагдсаныг тэмдэглэсэн байна. Мөн Газа болон Израилийн нөхцөл байдлаас шалтгаалан шаардлагатай бол ээлжит бус яаралтай хуралдааныг зарлан хуралдуулахад бэлэн байгаагаа илэрхийлжээ.