"Голомт” банкны жинхэнэ боссууд
Монголын улс төр, бизнесийн томчуудад "Голомт”-ын Д.Баясгалан гэх нэртэй, хүчтэй, хортой, зартай, зайтай эр бий. Гашуунсухайтын алдарт мухар төмөр замыг нууцын гэрээгээр, тендер сонгон шалгаруулалтгүй авч, утгаараа нүүрсчин болсон түүний гэр бүлийг цомхон танилцуулъя.
Туурга тусгаар болж, эхнэр нөхөр байхаа больсон ч түүний авааль гэргийг Ч.Мөнхцэцэг гэдэг. Өдгөө “Голомт” банкны ТУЗ-ийн даргын алба хашдаг. Магад салалтын бэлэг нь энэ биз.
Ч.Мөнхцэцэг хатагтайн тухайд Дэлхийн банкинд зөвлөх, АНУ-ын Азийн сангийн суурин төлөөлөгч, "Непко" хэвлэлийн компанийн Гүйцэтгэх захирал, "Тойм" сэтгүүлийн ерөнхий захирлаар ажиллаж байжээ.
Тэд дундаасаа хоёр хүүтэй. Том хүү нь инди фолк урсгалаар уран бүтээл туурвидаг дуучин Magnolian буюу Б.Дөлгөөн. Британийн Колумбын их сургуулийг төгссөн, боловсролтой, даруу залуу бий. Нэг талаар "Бодь интернэйшнл" ийн өв залгамжлагч. Банкир ааваасаа ялгаатай нь тэрээр урлаг уран сайхны сонирхолтой, дуулах авьяастайн дээр найзуудтайгаа хамтран "Fat Cat Jazz club"-ийг ажиллуулдаг хөдөлмөрч нэгэн. Өнгөрсөн онд түүний дууг NETFLIX 3000 ам.доллараар худалдан авчээ. Мөн "Од ба Гэгээ” УСК-нд гол дүр бүтээж, залуусын дунд мэдрэмж, сэтгэхүйгээрээ эрс ялгарч, үлгэр дуурайл үзүүлсээр буй.
Харин бага хүү Б.Дархлан нь Д.Баясгалангийн мөрөөдлийг биелүүлэн бизнесийг нь өвлөн авч, үргэлжүүлэхээр чармайж яваа гэнэ билээ.
