Шашин судлаач С.Янжинсүрэн хаа ч явсан Ерөнхийлөгчид зөвлөнө

Ерөнхийлөгч У.Хүрэлсүхэд бат арыг нь даадаг, шаггүй боловсролтой, найдвартай баруун гарууд цөөнгүй бий. Тэдний нэг нь шашин судлаач, доктор профессор С.Янжинсүрэн хатагтай. Өдгөө Ерөнхийлөгчийн Тамгын газрын Бичиг баримт, хяналт шинжилгээний газрын даргаар ажилладаг энэ хатагтай хаана ч боловсролын хэргэм зэргээрээ ялгардаг тодордог чамбай нэгэн. Үеийнхэн нь үгүй ядахдаа брэндээр гангарч, баян нөхрийнхөө халамжинд хөлбөрч хэвтэхэд манай доктор эрдэм ном ялангуяа Буддын шашин судлалд шамдаж, хоёр гурван оронд эрдмийн зэргээ ахиулсан гялгар доктор. Хажуугаар нь МУИС-д багшилна. Нэмээд Ерөнхийлөгчид зөвлөнө, төрд зүтгэнэ.

Тухайлбал, 2007 оноос эхлэн Үйлдвэр, худалдааны сайдын зөвлөх, Эрдэс баялаг, эрчим хүчний сайдын зөвлөх, Монгол Улсын Засгийн газрын гишүүн, Шадар сайдын зөвлөх, Шадар сайдын ахлах зөвлөхөөр тус тус ажиллаж байжээ.

Харин түүний нөхөр Б.Цэнгэл нь насаараа даргын сэнтийд заларч буй улс төрийн нууц ноёдын нэг. Өдгөө Төрийн өмчийн бодлого зохицуулалтын газрын даргаар ажиллаж буй Б.Цэнгэл даргын хяналтанд Монголын төрийн өмчит 80 гаруй компани, аж ахуйн нэгж байдаг гээд бодохгүй юу.

Намтар түүх сөхвөл тэртээ 2001 онд Нефть, онцгой албан татварын гаалийн газарт албаны даргын албыг хашсанаас хойш өнөөдрийг хүртэл төрийн аль том гэсэн даргын суудалд тухалж 13 томилгоо авсан арвин баялаг намтартай. Гэхдээ тэрээр зүгээр нэг төрийн түшмэл биш. Сайхан гэргийтэйг хэлэх үү, алган дээрээ бөмбөрүүлж, алт мөнгөнд хөлбөрүүлэхгүй ч гэлээ төрийн ордны чанх ард, хотын А зэрэглэлийн байршилд 1 метр кв нь 1000 ам.доллараар үнэлэгдэх байрлалд оффис худалдан авч, эхнэртээ бэлэглэж чадсан жаатай, зайтай эр. Тэрхүү оффис байшин дотроо доктор С.Янжинсүрэн хатагтайн бичгийн өрөө хэмээн эрхэмсэг ялгуун оршдог “гэжуга”.

Copyrights © 2026 БҮХ ЭРХ ХУУЛИАР ХАМГААЛАГДСАН. REELNEWS