Сү.Батболдын хүү Б.Баттүшиг МАН-ын бага хурлын гишүүн болох ард түмэнд таалагдах уу, Н.Учрал аа?

МАН-ын Бага хурлын хамгийн гялгар гишүүнээр Ерөнхий сайд асан Сү.Батболдын хүү Б.Баттүшиг тодорч байх шиг байна. Улс төрдөө тэнгэрийн ханхүү гэмээр өнгөлөг мөнгөлөг, гэргий нь МАК-ын брэндлэг гүнж Н.Цэлмүүн гэхчлэн Б.Баттүшиг өөрөө Имартын босс, Монголын олимпын хорооны Ерөнхийлөгч гээд яриад, бичээд байвал бүхий л гялгар CV түүнийх. Төрийн ордонд хадам ах Н.Номтойбаяр нь сууж байна. Хүргэн нь араас нь ороход ойрхон байна. Нэг мөсөн CU-гийн мантуун бууз шиг 1+1 гээд эхнэр Н.Цэлмүүнээ жагсаалтаар аваад орчихвол яасан юм. За за, наргиа шүү. Гэхдээ ямар жагсаалтад багтах 10 тэрбумгүй ч гэх биш, болохгүй нь юу байх билээ.

Ингэхэд мөнгөгүйн зовлонгоос мөнгөтэй баян хүмүүсийн зовлон бүр ч их юм шиг. Амбицлаад залуустай хөл нийлүүлэх гэнгүүт цаанаасаа шуламлаг, шуналтай юм шиг харагдчих гээд. Тэглээ гээд гэртээ хөшгөө хаагаад харанхуй өрөөний мухарт нуугдалтай нь биш Бага хурлын гишүүн ч болсон болоод улс төрөө бараадаж л явбал өлзийтэй “гэжуга”. Ер нь тэгээд хүссэн, хүсээгүй хамаг л үнэтэй боловсролыг эзэмшчихсэн, нам, төрд зүтгэчихсэн хунтайжууд үе залгамжлан улс төрд хүч түрж байна даа.

Copyrights © 2026 БҮХ ЭРХ ХУУЛИАР ХАМГААЛАГДСАН. REELNEWS