Дубай сет: Татварын дарга нар Дубай руу дунджаар 70 сая төгрөгөөр зугаалж явна
Нийслэл дүүргийн татварын хэлтсийн дарга нар ажлаа таслаад Дубай руу зугаалахаар явсан нь олны шүүмжлэлийг дагуулж байна. Энэ талаар Сангийн сайд Б.Жавхлан "Нийслэл, дүүргийн татварын хэлтсийн 10 гаруй дарга нар ажлаа таслаад, даргаасаа чөлөө, амралт авалгүй бөөндөө зугаалаад явсан байна. Тиймээс хариуцлага тооцох арга хэмжээ авахыг Татварын ерөнхий газрын даргад үүрэг болголоо. Энэ бол ёс суртахууны хувьд ч байж болохгүй зүйл. Татварын ерөнхий газрын дарга явж болохгүй гэдгийг анхааруулсан юм билээ. Гэвч өөрсдөө ингээд дур мэдэн явчихсан байна" гэв.
Дубайд зугаалж яваа татварын дарга нарыг дурдвал,
ХУД-ийн татварын хэлтсийн дарга Г.Сүрэнтамжид
СБД-ийн татварын хэлтсийн дарга Б.Баатар
Нийслэлийн татварын газрын дарга М.Болдбаатар
БГД-ийн татварын хэлтсийн дарга М.Ганжигүүр
Багахангай дүүргийн татварын хэлтсийн дарга Х.Анхбаяр
ЧД-ийн татварын хэлтсийн дарга Н.Туул
БЗД-ийн татварын хэлтсийн дарга Э.Энх-Очир
Налайх дүүргийн татварын хэлтсийн дарга Ц.Алтанцоож
СХД-ийн татварын хэлтсийн дарга Б.Энхтогтох гэх хүмүүс татвар төлөгчдийн мөнгөөр амарч зугаалан, алжаал ядаргаагаа тайлж яваа аж.
Тэгвэл Дубай руу зугаалах зардлыг тооцож үзье. Аялалын компаниудын Дубайн аялал дунджаар нэг хүний 6.900.000 төгрөг байдаг байна. Энэ ханшаар тооцвол нийт 10 хүний зардал багадаа 70 сая төгрөгөөр яригдана. Энэ мөнгө хаанаас гарсан нь сонирхолтой.
Манай улс сүүлийн жилүүдэд татвар татаас, торгуулийн орон болж хувирч байгаа. Байшин барина татвар, машин унана татвар, жижигхэн дэлгүүр нээсэн ч татвар бүр цаашлаад нас барсан эцгийнхээ өв хөрөнгийг өвлөж авахад хүртэл татвар төлдөг. Энэ олон татвар татаас иргэдийн амьдралд тулгарч байгаа хүнд асуудлуудын нэг болж байна.
Албан ёсоор Монгол Улсад нийт 30 төрлийн татвар, төлбөр, хураамж байдаг. Тоо нь л ийм их байхад дарамт мэдрэгдэх нь ойлгомжтой. Төр энэ бүхнийг албан татвар, төлбөр, хураамж гэж гурван өөр нэрээр ангилдаг ч иргэний халааснаас гарах мөнгөний хувьд ялгаа бараг үгүй. Орлого олбол авна, өмчтэй бол авна, хэрэглэвэл авна. Өөрөөр хэлбэл амьдралын аль ч шатанд татварын сүүдэр байнга дагаж явдаг.
Саяхан оны өмнө Татварын ерөнхий газраас хувийн аж ахуйн нэгжүүдийг татвараа төлөхийг шаардаж өдөр шөнөгүй дарамталж, дансыг нь хааж боож, төрийн төмөр нүүр гаргаж байв. Гэтэл шинэ он гарав уу, үгүй юу хурган дарга нар нь ийн гадаадад амарч, зугаалаад харин энгийн иргэд нь ажлаа хийж, татвараа мачийтлаа төлсөөр. Шударга ёс хаана байна вэ.
М.Үүрийнтуяа
