Эмээлт аж үйлдвэрийн парк чинь үнэртний дэлгүүр биш ээ, Б.Мягмар дарга аа!

Эмээлт эко аж үйлдвэрийн парк ХК-ийн Гүйцэтгэх захирал Б.Мягмар арваннэгдүгээр сарын 14-нд Хяналт шалгалтын газрын даргад хаяглан нэгэн албан бичиг илгээжээ. Албан бичгийн агуулга нь "Эмээлт аж үйлдвэрийн парк байгуулахаар бэлтгэл ажлыг ханган ажиллаж байгаа бөгөөд энэ хүрээнд тус аж үйлдвэрийн паркийн харьяа бизнес инкубатор, үйлдвэрлэл сургалтын төв Хан-Уул дүүргийн 13-р хороо буюу Туул тосгонд нээгдэж, энэ сарын эхээр үйл ажиллагаагаа эхэлсэн юм байна. Гэтэл салхин дээрээс нь буюу Сонгинохайрхан дүүргийн 32-р хороонд үйл ажиллагаа явуулж буй “Ясны үйлдвэр” орчмоос их хэмжээний муухай үнэр гарч, ажилчдынх нь ажиллах тав тухыг алдагдуулж цаашлаад эрүүл мэндээрээ хохирох эрсдэл үүсчээ. Иймд уг үйлдвэр үйл ажиллагаа эрхлэх зөвшөөрөлтэй эсэх, газрыг зориулалтын дагуу ашиглаж байгаа эсэхэд шалгалт хийж зөрчлийг арилгах арга хэмжээ авч өгөн биднийг ажиллах нөхцөлөөр хангаж өгнө үү" гэжээ.

Албан бичгийнх нь агуулга, найруулга дүүрч гэхэд хотын захын хороо, тосгонд тэгэх тусмаа Эмээлтэд яс, арьс, шир зэрэг түүхий эд боловсруулах үйлдвэрүүдийг гаргаж, аж үйлдвэрийн парк байгуулахаар ажиллаж байгаа төрийн өмчит компанийн захирал хүн ясны үйлдвэрийн үнэрээс болж албан бичиг ийш тийш чулуудаж суугаа нь инээдэм гэхээсээ илүү эмгэнэл биш гэж үү.

Түүхий эд боловсруулах ямар ч үйлдвэрээс тодорхой хэмжээнд үнэр танар гарна. Түүнийг нь тооцож захын хороо, дагуул тосгонд төвлөрүүлж байгаа аж үйлдвэрийн парк, эрхэлж буй ажлынхаа бодлогыг ойлгоогүй явна гэж байх уу? Эсвэл төрөлхийн тэмцэгч зан нь хөдлөөд “эвгүй үнэртэй” байлдахаар шийдсэн юм болов уу.

Улаанбаатар хотын удирдлагууд Налайх, Багануур, Багахангай дүүргүүддээ аж үйлдвэрийн парк байгуулж, төрөлжүүлэн хөгжүүлнэ гэж том том ярьсаар өдий хүрсэн. Дээрх албан бичгээс харвал лав Эмээлт аж үйлдвэрийн паркийнх нь үйл ажиллагаа эхэлсэн юм байна. Тэдгээр паркаа Эмээлтийнх шиг үйлдвэрчний эвлэлийн идэвхтнээр удирдуулбал үйлдвэрлэл лав хөгжихгүй ээ. Тэнд үйл ажиллагаа явуулж байгаа хэдэн хувийн хэвшлээ энэ мэтээр шахаж дарамтлаад, шалгаж хянаад байвал аж үйлдвэр яаж хөгжих юм! Төр оролцсон юм болгон жонхуурдаг гэдэг нь Эмээлт дээр давтагдах вий.

Дашрамд Б.Мягмар даргад Эмээлт, Туул тосгон чинь мал аж ахуйн гаралтай түүхий эдийг татан төвлөрүүлж, боловсруулж зах зээлд гаргах концепцитэй аж үйлдвэрийн парк болохоос Үндэсний цэцэрлэгт хүрээлэн биш шүү гэж үг дайя. Хэрэв муухай үнэр танараас зугтаж байвал хатантан та үнэртний үйлдвэрт ажиллана уу.