УИХ-ын гишүүн асан П.Анужин: Ээж нь хүүгээ хөл дээрээ тэнцэхийг зургаан жил, 2190 хоног хүлээлээ

УИХ-ын гишүүн асан П.Аужин хоёр охин, хоёр хүүтэй. Тэрээр Э.Нандинзүрхтэй ханилан сууж, хоёр хүүгээ төрүүлсэн байдаг. П.Анужин хоёр хүүгийнхээ ааваас өрх тусгаарласан шалтгаанаа саяхан цахим хуудастаа бичсэн юм. Тэгвэл түүний бага хүүгийн төрсөн өдөр өнөөдөр тохиож байгаа бөгөөд хүүгийнхээ талаар юу туулж яваагаа сэтгэгдлээ хуваалцжээ.

Тэрээр "2025.04.07

Агуудам төрсөн өдөр

Ээж нь хүүгээ хөл дээрээ тэнцэхийг зургаан жил, 2190 хоног хүлээлээ. Ээжээ хайртай гэж хэлд орчихоод нэмж үг хэлэхийг нь хүлээж мөн л энэ хугацааг амьсгалаа даран түгжин хүлээлээ. Ээж нь, Нука нь, ах эгч нар нь, эмээ өвөө нь бид бүгд хүлээж байна. Зүүдэндээ зөндөө удаа гүйж байхыг нь харлаа. Хорвоо дээр юу чамайг босгоно, хэн чамд тус болно гэсэн бүгдийг зориулж, ойртуулахыг хичээж явна. Судалж ч явна. Бид хоёроос илүү хүнд маамаа нар эдгэж босохын төлөө тэмцэж байхыг хоёулаа зөндөө харсан, хүч авдаг аа тэднээсээ. Хүнийг хайрлахын утга учрыг бүрэн таниулсан хүү чамайгаа яг тийм их, чин хайраар, бүр элэг зүрх, эд эсээрээ ээж нь хайрладаг юм шүү.

Миний хүү сайжирсаар байгаа. Миний хүү эдгэнэ. Бас сайн эр хүн болно. Миний хүү тэвчээртэй эмчлүүлдэг, тэнхээтэй давдаг, Гайхалтай.

Хүүгээ сайхан болохоор бидэнд тус болсон зам мөр бүхнийг бичнэ ээ. Эрүүл мэнд эмзэг тул тэнд энд сайн гэж зөвлөхөөс би эмээдэг. Эхлээд өөрөө туулаад гаръя гэж боддог юм. Өвдөж байгаа хүүхдүүд, хүүхдээ үүрсэн эцэг эхчүүдийг би чин зүрхнээсээ мэдэрдэг. Шаналсан зүрхний цохилт худал байдаггүй юм. Би гишүүн байхдаа нялх хүүхдүүдийн төлөө, тэр дундаа эмчилгээгүй шаналж буй хүүхдүүдийн төлөө чадах зүйлээ хуулийн хүрээнд хийсээн. Орилж хашгирч явахаар чимээгүй хийе л гэж зүтгэсэн. Хийж амжаагүй, өөрчилж чадаагүй зүйл мэдээж их бий.

Ах эгч нарыг нь чиний насан дээр сургуульд оруулж, онц сураарай гэдэг байв. Бяцхан биенээс ямар ихийг шаарддаг байж вэ гэж одоо ээж нь өөрийгөө зэмлэдэг. Хүүхэд бүрэн бүтэн, хөл дээрээ гишгэж л байхад хорвоод өөр ямар ч шунал хэрэггүйг хүү минь чи л надад ойлгуулсан. Юмс их энгийн юм байна лээ. Үүнийг мөн л чи минь надад ойлгуулсан.

Чи биднийг бүчсэн хуурамч худлын нэвсгэр дээлийг тайлаад шидчихлээ хоёулаа. Өөрсдийн даахаа л дааж амьдаръя.

Энэхэн биеэс минь тасарсан, хамгийн хөөрхөн хүү чамдаа хорвоод энгийн сайхнаар, өөрийнхөөрөө тэнүүн амьдрахыг ээж нь хүсье! Миний хүү хөлд ороорой, тэнцээрэй. Ээж нь үхтлээ зүтгэнэ, үхсэн ч зүтгэнэ! Хүүгээ үүрээд явах нас тэнхээ минь хэзээ ч дуусахгүй.

Над шиг, бидэн шиг замыг туулж буй бүх аав ээж, бяцхан үрсэд нь чин зүрхний хайраа илгээж, өндөрт байх нарыг харан бүлээцэж, уудам талаа харан уужирч, хорвоод зөвхөн би л зовоогүй гэдгээ таньж Өөдтэй өөдрөг алхахыг хүсье ээ!

Бага хүүг Агуудам гэдэг. Уудам гэсэн утгатай. Ахыг нь Агула гэдэг. Уул тал шиг хоёр сайхан хүүтэй хүн би, бид алзахгүй ээ."  хэмээн бичсэн байна.