Эрүүл мэндийн сайд Э.Батшугарын мэргэжлийн томилгоо буюу Н.Эрдэнэбаяр гэж хэн бэ?

Шинэхэн Ерөнхий сайд Н.Учралын кабинетын хамгийн их анхаарал томилгоо бол Эрүүл мэндийн сайд Э.Батшугар байсан. Нэгд, Э.Батшугар эрүүл мэндийн салбарын хүн биш. Хоёрт, ЦХИХХ-ны сайдаас хаа байсан ЭМ-ийн сайд руу үсэрсэн нь заавал ингэж яам дамнах шаардлага байсан уу гэх асуулт араасаа дагуулсан. Гэвч одоогоор Э.Батшугар шиг хурдан шуурхай, мэдрэмжтэй ажилласан гэж олон нийтээс үнэлгээ авч буй сайд алга байгааг дурдах нь зүй. Ядахдаа л Э.Батшугар шиг өмнөх Төрийн нарийнаа халж, шинэ томилгоо хийсэн яам, сайд одоогоор алга байна.

Тус яамны Төрийн нарийн бичгийн даргаар Т.Очирбат ажиллаж байсан бөгөөд түүнийг энэ салбарт бугласан “шүдний өвчнүүдийн” нэг байсан талаарх сэдэв ч хөндөгдөөд авсан. Тэгэх тусмаа түүний томилгоо ЭМДС-гийн дарга Л.Бямбасүрэн авилга, албан тушаалын хэргээр ял авсан явдалтай зэрэгцсэнийг ч хэлэх үү, тус яамны ихэнх төсөл, тендерийг давуу эрхтэйгээр авдаг G7 /Их долоогийн бүлэглэл/ бүлэглэлийн толгойлогч байсан гэх яриа хэсэг хүчээ аваад намжаад буй. Зарим нь Т.Очирбатыг зүгээр халаад явуулах биш, салбарт олон жил ажиллахдаа ямар бантан хутгаж, төсөл тендер авсныг нь шалгах ёстой гэх өнцөг ч хүчтэй яригдсан.

Ямартай ч ажлаа авмагцаа Төрийн нарийнаа “хөөж явуулсан” Э.Батшугар хувьсгалын тохироо гэдэг шиг эгзэг нь таарсан халаа сэлгээ хийсэн учир нэмэх оноо авах нэг үзүүлэлт болсон.

Т.Очирбатын оронд ЭМЯ-ны Төрийн нарийн бичгийн даргаар Анагаах ухааны их эмч Н.Эрдэнэбаяр томилогдоод байгаа. Ажлаа авмагцаа мерит зарчим, хууль дээдлэх ёс, ил тод байдал, хариуцлагыг үйл ажиллагааныхаа суурь болгон ажиллахаа мэдэгдсэн Н.Эрдэнэбаяр нь урд өмнө нь улс төрийн албан тушаал, элдэв томилгоо авч байгаагүй цэвэр мэргэжлийн нэгэн юм байна. Тэрээр АУИС-ийг Хүний их эмчээр, Японы Токушимагийн их сургуулийг Анагаах ухааны доктор зэрэгтэй төгсжээ.

Ажлын туршлагын тухайд:

1997–1998 онд Сэлэнгэ аймаг, Баянгол сумын ЭМТ-д их эмч,
2001–2003 онд ЭМШУИС, Харшил, астмын лабораторид судлаач,
2003–2004 онд “Монос” АУДС, багш,
2004–2006 онд АШУҮИС, багш, ахлах багш,
2006–2010 онд Япон, Токушимагийн их сургуульд докторант, туслах багш,
2010–2012 онд АШУҮИС, ахлах багш,
2012–2025 онд Цус сэлбэлт судлалын үндэсний төвийн захирал,
2025-2026 онд Эм, эмнэлгийн хэрэгслийн хяналт, зохицуулалтын газрын даргааар тус, тус ажиллаж байжээ.

Дашрамд ЭМ-ийн сайдаар Э.Батшугараас өмнө Т.Мөнхсайхан, Ж.Чинбүрэн нарын гишүүд ээлжлэн ажилласан ч салбартаа дорвитой ажил, олигтой реформ хийж чадаагүй. Хоёулаа салбараас төрсөн сайдууд, хоёулаа МАН-ын гишүүд тэгэх тусаа нэг фракцийн буюу Ерөнхийлөгч У.Хүрэлсүхийн хүмүүс атлаа нэг нь сайд болоход нөгөө нь ажлыг нь шүүмжилж, бөгсийг нь ухсаар тэдний томилгоот хугацаа дууссан гэж болно. Хувийн ашиг сонирхлын үүднээс танил талын хүмүүсээ өндөр албан тушаалд томилж, тэд нар нь улсын төсөв тонодог, хувьдаа завшдаг, хууль бусаар хөрөнгөждөг тухай асуудал ч чих дэлсэж байв. Товчхондоо тэдний хэн нь ч боломжийн үнэлгээ авах хэмжээнд ажиллаж чадаагүй учраас салбарын бус сайд Э.Батшугарт танхимынх нь тэргүүнээс авахуулаад салбарынх нь эмч нар, жирийн олон нийт хүртэл ихээхэн найдлага тээж байна.

М.Үүрийнтуяа