Тодруулга: “OOGII” брэндийн үүсгэн байгуулагч О.Оюунцэцэг: Би хэнийг ч залилж, луйвардаагүй, бүх баримт нь байгаа

“OOGII” брэндийн үүсгэн байгуулагч О.Оюунцэцэг нь бусдыг гадаадад сургах нэрийдлээр залилж их хэмжээний хохирол учруулсан төдийгүй рецедив гэмт хэрэгтнүүдээр дарамтлуулсан гэх мэдээлэл сүүлийн үед олны анхаарлыг татаад буй. Мөн түүнийг Олон улсад интерполын “Хөх булант” зар мэдээгээр эрэн сурвалжилж байна гэх мэдээлэл бий.

Тэгвэл энэ талаар цагдаагийн байгууллагаас тодруулахад "Баянзүрх дүүргийн цагдаагийн хэлтэст иргэн О.Оюунцэцэг дээр үүссэн хэд хэдэн иргэний гомдлын дагуу шалгалтын ажиллагаа үргэлжилж байгаа нь үнэн" гэсэн юм.

Харин “OOGII” брэндийн үүсгэн байгуулагч О.Оюунцэцэгээс өөрөөс нь тодруулахад "Олон улсад эрэн сурвалжлагдаж байгаа гэх мэдээлэл худлаа. Тийм зүйл огт байхгүй. Би хүмүүсийг луйвардаж залилаагүй. Бүх баримт нь байгаа. Гэхдээ одоогоор дэлгэрэнгүй мэдээлэл өгөх боломжгүй байна" гэлээ.

Болсон явдал Австрали улс руу оюутан зуучлагч О.Оюунцэцэг нь сургууль бариулсан компанийнхаа захирлыг луйвардаж, рецедив гэмт хэрэгтнүүдээр дарамтлуулсан гэх мэдээлэл цахим орчинд цацагдсан.

Албан бус эх сурвалжийн мэдээллээр урьдчилсан байдлаар 9 иргэн тэрбум гаруй төгрөг болон цаг хугацаагаараа хохироод байгаа аж. Нэг иргэн 10 гаруй сая төгрөгөөр хохирсон байна. Хохирогчид түүнийг гэрээ хийх нэрээр халхавчлан бусдыг залилсан хэмээн үзэж байгаа.

Харин хуулийн байгууллагаас гэрээ хийсэн учраас залилангийн гэмт хэрэг биш, иргэний хэргийн шүүхэд ханд гэсэн тайлбарыг өгсөн байна.

Энэ талаар бид эргэн мэдээлэх болно.