Ардчилсан намын увайгүй акц тэднийг бүр “унхиагүй” харагдуулж байна
Хаврын чуулган эхэлмэгц Ардчилсан намынхан УИХ-ын дарга Н.Учралыг “албан тушаалаа өгөх хүртэл чуулганы хуралдаанд оролцохгүй” гэж мэдэгдсэн. Ингэхдээ Ардчилсан намын дарга О.Цогтгэрэл “Олон намаас бүрдсэн парламентын дарга намын даргын албыг давхар хаших нь зохисгүй гэж үзэж байна. Өнөөдрийн Монгол Улсын Их Хурлын дарга Н.Учрал нь МАН-ын даргын албыг хавсран гүйцэтгэж байгаа учраас түүнийг УИХ-ын даргын албан тушаалаа өгөх хүртэл Ардчилсан намын бүлэг чуулганы хуралдаанд оролцохгүй” гэсэн юм. Өөрөөр хэлбэл, УИХ-ын дарга Н.Учралыг огцрохыг шаардав. Уг нь Н.Учралыг УИХ-ын дарга болоход Ардчилсан намын 19 гишүүн дэмжиж саналаа өгсөн байдаг. Тодруулбал, О.Алтангэрэл, О.Амгаланбаатар, Д.Батбаяр, Ж.Батсуурь, Ж.Баярмаа, Х.Болормаа, А.Ганбаатар, Д.Жаргалсайхан, Ц.Мөнхбат, Л.Мөнхбаясгалан, С.Одонтуяа, Б.Пүрэвдорж, Ц.Туваан, Б.Түвшин, Г.Хосбаяр, О.Цогтгэрэл, С.Цэнгүүн, Д.Энхтуяа, Р.Эрдэнэбүрэн нарын 19 гишүүн УИХ-ын даргаар Н.Учралыг сонгохыг дэмжиж байжээ. Атал өнөөдөр түүнийг суудлаас нь буулгах зохиол бичиж, УИХ-ыг бойкотлох акцаа идэвхжүүллээ.
Навч унахад намар шалтаг байсан гэгчээр УИХ-ын дарга Н.Учрал МАН-ын даргаар сонгогдсон нь Ардчилсан намынханд хаврын улс төрийг хуйсгануулах, нөгөө талаараа өөрсдөдөө ашиггүй хуулийн төслүүдийг гацаах шалтаг байлаа, үнэндээ. Энэ хаврын чуулганаар хэд хэдэн чухал хуулийн төслүүдийг хэлэлцэх товтой байгаа. Жишээ нь, Эдийн засгийн эрх чөлөөний тухай, Татварын тухай багц төслүүд, Гадаадын банкийг монголд оруулж ирэх хууль эрх зүйн орчныг бүрдүүлэх зэрэг иргэд, аж ахуй нэгжид хэрэгтэй шил, шилээ дарсан олон хууль хэлэлцэгдэхээр хүлээгдэж буй. УИХ өнгөрсөн намрын чуулганы турш эрх баригч намынхны тамганы хэрүүлээс болоод хуралдаж, хуулиудаа хэлэлцэж бараагүй. Гэтэл хаврын чуулган эхлүүт АН, МАН-гүй шантааж хийгээд эхлэх нь үнэндээ увайгүй харагдуулж байна
АН-ын гол бойкот нь “гадаадын банк оруулж ирэх хуулийг хэлэлцэхгүй” унагах явдал гэх мэдээлэл бий. Гадаадын банк Монголд оруулж ирэхийг иргэд, олон нийт алга ташин дэмжиж байгаа. Хэрэв хууль эрх зүйн орчин бүрдэж манай улсад гадны банк ороод ирвэл дотоодын банкнууд эрүүл өрсөлдөөнд орж, зээлдэгчдээ томрох биш хойноос нь гүйх цаг ирэх нь тодорхой. Цаашлаад 3-5 жилдээ зээлийн хүү 6 гаруй хувиар буурна гэж эдийн засагчид онцолж байгаа. Гэтэл Ардчилсан намын зүгээс энэ хуулийг гацааж хэлэлцүүлэхгүй байх нөхцөл бүрдүүлж байна.
Чухамдаа, УИХ-ын гишүүн бол төрийн эрх барих дээд байгууллагад сонгогдсон ард түмний илч төлөөлөгч бөгөөд нийт иргэн, Улсын ашиг сонирхлыг эрхэмлэн баримтална гэж заасан байдаг. Гэтэл зөвхөн сандал суудал горилж ийм увайгүй акц явуулах нь Ардчилсан намыг бүр илүү унхиагүй харагдуулж байна.
М.Үүрийнтуяа
