"Улаанбаатар Сонгдо" эмнэлэг алдаа гаргаж, Б.Ганхуягийг хүнцэлд хордсон гэх буруу дүгнэлт гаргажээ
Нүүрсний гэх хэрэгт яллагдагчаар татагдаад өдгөө шүүхээр гэм буруугаа дэнслүүлэхээр хүлээж байгаа шүүгдэгч Эрдэнэс таван толгой ХК-ийн гүйцэтгэх захирал Б.Ганхуягийг хүнцэлд хордсон гэх мэдээлэл гарсан. Улмаар эмнэлгийн шинжилгээний бичгээр баримтжуулан ар гэрийнхэн нь олон нийтэд үзүүлж байсан билээ. Тэгвэл үүнтэй холбоотойгоор цагдаагийн байгууллагаас шалгахад “Улаанбаатар Сонгдо” эмнэлэг ноцтой алдаа гаргаж, Б.Ганхуягийг хүнцэлд хордсон гэж дүгнэлт гаргасан болох нь тогтоогджээ.
Тодруулбал, “Олон нийтийн цахим сүлжээнд нийтлэгдсэн Шүүхийн шийдвэр гүйцэтгэх ерөнхий газрын харьяа Цагдан хорих 461 дүгээр хаалттай ангид цагдан хоригдож байгаа “Б.Ганхуягийг хүнцэл нэртэй химийн элементээр хордуулсан байж болзошгүй” гэх мэдээллийг түүний гэр бүлийн хамаарал бүхий зарим иргэдээс мэдээлснийг Прокуророос харьяалал тогтоосны дагуу Мөрдөн байцаах албанаас мөрдөн шалгах ажиллагаа явуулжээ. Шүүгдэгч Б.Ганхуяг нь 2023 оны 11 дүгээр сард “Улаанбаатар Сонгдо” эмнэлэгт онош тодруулах зорилгоор хэвтэн эмчлүүлэх үед тус эмнэлгээс Эрүүл ахуй, хор судлалын лабораторид сорилт шинжилгээ хийлгэжээ. Мөрдөн шалгах ажиллагааны явцад цугларсан нотлох баримтаар
“Улаанбаатар Сонгдо” эмнэлгээс цусанд илэрсэн 9,29 мкг/дл хүнцлийн хэмжээг нэгжид шилжүүлэхдээ алдаа гаргасан. Хүний биед хүнцэл 9200 дахин ихэссэн бол хүн амьд явах боломжгүй ба Ба.Ганхуягаас авсан биологийн дээжид хийсэн 2023 оны 11 дүгээр сарын 29-ний өдрийн Эрүүл ахуй, хор судлалын шинжилгээгээр цусанд хүнцэл 9,26 мкг/дл, шээсэнд 0,86 мкг/дл, үсэнд 0,24 мкг/дл, мөн 2023 оны 12 дугаар сарын 14-ний өдөр давтан хийсэн “Хэлт энд сэфти солушинс” ХХК-ийн лабораторийн шинжилгээгээр цусанд 8,96 мкг/дл, үсэнд 0,22 мкг/г, шээсэнд илрээгүй зэрэг нь хүнцлийн хэмжээ зохих түвшинд байгаа нь тус тус тогтоогдсон байна.
Мөрдөн шалгах ажиллагаагаар тогтоогдсон дээрх нөхцөл байдал нь гэмт хэргийн шинжгүй тул хэрэг бүртгэлтийн хэрэг нээхээс татгалзах саналтай 2023 оны 12 дугаар сарын 25-ны өдөр Баянгол дүүргийн Прокурорын газарт хүргүүлж, энэ тухай гомдол гаргагчид албан бичгээр хариу мэдэгджээ.
Өөрөөр хэлбэл “Улаанбаатар Сонгдо” эмнэлэг ноцтой алдаа гаргаж шинжилгээний хариуг ташаа гаргасан болох нь мөрдөн байцаалтын явцад тогтоогдсон байна.
