Монголын Хэвлэлийн Хүрээлэнгийн 30 жилийн ой энэ өдрүүдэд тохиож байна
Ойн хүрээнд “Монголын хэвлэл мэдээллийн тогтвортой байдлын форум” зохион байгуулав. Форумд хэвлэл мэдээлэл,бодлого шийдвэр гаргагч, иргэний нийгэм, олон улсын байгууллагын 200 орчим төлөөлөл оролцож “Монголын хэвлэл мэдээллийн тогтвортой байдлыг үнэлгээ-2026” судалгааны үр дүнд тулгуурлан салбарын хараат бус, тогтвортой хөгжлийн ирээдүйн талаар санал солилцож байна.
Тус хүрээлэнгээс ЮНЕСКО-гийн Харилцаа холбооны хөгжлийг дэмжих олон улсын хөтөлбөр (IPDC)-ийн дэмжлэгтэйгээр дээрх судалгааг Монголд анх удаа хэрэгжүүлж, хэвлэл мэдээллийн тогтвортой байдлыг дөрвөн үндсэн шалгуураар үнэлж, нэгтгэн дүгнэснээ хураангуйлан өнөөдөр ийн танилцуулж, хэлэлцүүлэг өрнүүлж буй юм. Хэлэлцүүлэгт Хэвлэлийн хүрээлэнгийн гүйцэтгэх захирал М.Мөнхмандах “Хэвлэл мэдээллийн гацаа& гаргалгаа” сэдвээр үндсэн илтгэл тавьж, “Платформын эрин үе ба итгэлцэл”, “Чанартай сэтгүүл зүйн хэрэгцээ ба бодит боломж” панел хэлэлцүүлгээр үргэлжилж байна.
Мөн “Хэвлэл мэдээллийн бизнесийн загварууд: Боломж& Эрсдэл”, “Хүний нөөцгүй хэвлэл мэдээлэл: Сэтгүүл зүйн салбар дахь хямрал”, “For the English-speaking community: Mongolia’s Media Crossroads: Fragility, Trust, and Survival” сэдвээр салбар хэлэлцүүлэг өрнүүлж, хэвлэл мэдээллийн салбарын алдаа оноо, тулгамдаж байгаа асуудал цаашдын сорилт, боломж шийдлийн талаар мэргэжил нэгтнүүд дуу хоолойгоо хүргэнэ. Түүнчлэн Австрали улсын туршлагад үндэслэн хэвлэл мэдээллийн бизнес хэрхэн өөрчлөгдөж байгаа талаар Хэвлэлийн Хүрээлэнгийн Байгууллага хөгжлийн ментор Моника Янш илтгэл танилцуулна.
“Монголын хэвлэл мэдээллийн тогтвортой байдлыг үнэлгээ-2026” судалгааны хүрээнд хэвлэл мэдээллийн эрх зүйн тогтвортой орчныг зөвхөн хэвлэлийн эрх чөлөөнд хамаарах хуулиар бус, эрсдэлийг бууруулж, олон нийтийн ашиг сонирхолд нийцсэн мэдээллийг хамгаалж, хэвлэл мэдээллийн байгууллагуудын урт хугацааны төлөвлөлт, хөрөнгө оруулалт, хүний нөөцийн тогтвортой байдлыг дэмжих институцийн нөхцөл бүрдэж байгаа эсэхээр үнэлэх шаардлага байна гэж үзжээ. Мөн хэвлэл мэдээллийн хараат бус байдал, ялангуяа өргөн нэвтрүүлгийн зохицуулалт, олон нийтийн хэвлэл мэдээллийн удирдлага ба санхүүжилт, төрийн зар сурталчилгаа болон бусад нөөцийн хуваарилалтын ил тод, төвийг сахисан байдал хангалтгүй. Мэдээлэл авах эрхийн тухай хууль тогтоомж цаасан дээр сайн боловч хэрэгжилт сул байгаа гэх судалгааны дүн гарсан байна.
Данийн Олон улсын Хөгжлийн агентлагийн санхүүжилт бүхий “Чөлөөт хэвлэл” төслийн хүрээнд 1996 онд анх байгуулагдсан цагаас эхлэн Хэвлэлийн Хүрээлэн мэргэжлийн сэтгүүл зүйг төлөвшүүлэх, хэвлэл мэдээллийн салбарын хөгжлийг судлах, ардчилал, ил тод байдлыг бэхжүүлэхэд үнэтэй хувь нэмэр оруулж иржээ. Өнгөрсөн 30 жилийн хугацаанд тус хүрээлэн 1322 сургалт, уулзалт хэлэлцүүлэг зохион байгуулж, давхардсан тоогоор 34358 гаруй хүн хамруулж, 274 судалгаа, 142 ном, гарын авлага боловсруулж, шилдэг бүтээлийн 37 уралдаан зохион байгуулсан байна.
