Дуучин Бэки буюу Г.Мөнхбаяр урлагаас төрд "крандуулав"

Дуучин Бэки буюу Г.Мөнхбаяр Шадар сайдын эдийн засаг, хөрөнгө оруулалтын зөвлөхөөр томилогдсон нь олон нийтийн анхаарлыг татаж байна. Тэрбээр урлагийн салбараас төрийн бодлогын түвшинд ажиллах болсон нь сошиал орчинд нэлээд хэлэлцүүлэг дагуулж, зарим иргэдийн зүгээс шүүмжлэх өнцөг ч илэрхийлээд буй.

Олон нийтэд тэрбээр дуучин төдийгүй загвар өмсөгч Х.Бадамгэрэлийн нөхөр гэдгээрээ танигдсан. Хосууд Монголын загвар, шоу бизнесийн салбарт танигдсан гэр бүлүүдийн нэгт тооцогддог.  Тэрбээр МУИС-ийн Эдийн засгийн сургуулийг эдийн засагч, санхүүгийн мэргэжлээр бакалавр болон магистрын зэрэгтэй төгссөн байна. Мөн сүүлийн 16 жилийн турш эдийн засаг, бизнесийн орчинд олон улсын болон дотоодын аж ахуй нэгжүүдэд ажилласаар иржээ. 

Уран бүтээлийн хувьд Бэки нь поп, R&B чиглэлд уран бүтээл туурвиж, залуусын дунд танигдсан хэд хэдэн дуу гаргасан. Түүний дуунууд ихэвчлэн хайр, харилцаа, амьдралын хэв маягийг илэрхийлсэн өнгө аястай бөгөөд клип, тайзны дүр төрхөөрөө анхаарал татаж ирсэн. Хэдийгээр тэр Монголын хөгжмийн зах зээлд хамгийн идэвхтэй, олон хит дуу гаргасан уран бүтээлчдийн нэг биш ч тодорхой хүрээнд өөрийн сонсогч, фэнүүдтэй.

Төрийн албанд томилогдсонтой холбоотойгоор тэрбээр олон нийтийн шүүмжлэлд хариу өгөхдөө өөрийн боловсрол, бизнес, хөрөнгө оруулалтын чиглэлээр ажилласан туршлагаа онцолж, зөвхөн урлагийн хүн гэх шалтгаанаар үнэлэх нь өрөөсгөл гэдгийг илэрхийлжээ. Урлагийн салбараас төрийн бодлогын хүрээнд ажиллах болсон нь Монголд төдийлөн элбэг тохиолддог жишиг биш учраас түүний цаашдын ажил, бодит үр дүн олон нийтийн анхаарлын төвд байх нь гарцаагүй юм.