“Бумбаны их тахилга” энэ сарын 28, 29-нд болно
Бурхан шашны Гандантэгчинлэн хийд жил бүр Бумбаны тахилгыг уламжлал болгон сүсэгтэн олон түмэнд зориулан хийдэг. Тэгвэл Бумбаны тахилгыг ирэх Бямба, Ням гарагт зохион байгуулна.
Есөн хүслийн цог учралыг зуны их далай хийгээд шинийн саран мэт арвижуулагч чандмань эрдэнийн сан Намсрай Гонгор бурханы бумбыг хийд орон, айл өрх залж хадгалснаар:
• Хүмүүн амьтны үгүйрэл хоосрол арилж, нас буян, цог хийморь, сүр хүч дэлгэрэн өвчин зовлонгүй амгалантай болно.
• Бурханы шашин өнө удаан оршиж, мэргэн, ариун, сайн гурван үйлс зохиол арван зүгт дэлгэрнэ.
• Энэ насны идээ ундаа, эд таваар, төгс эдлэл, бүгд хуран чуулахын шалтгаан болохын хамт хойд насны үйлс шамдал үгүй аяараа бүтнэ.
• Ихэс дээдсийн өлмий батжиж төр, шашны үйл дээш арвидна.
НАМСРАЙ БУРХАНЫ БУМБА
Намсрай бурхны бумбыг бүтээн залж тахисны ач тус нь аливаа бүхний хишиг буян, эд эдлэлийг хурайлан дуудаж элдэв өлзий бусыг арилган ертөнц дэх түмэн зүйлийн ядуурал хоосролоос бүрэн ангижруулж эд эдлэл хишиг буянаар цаг ямагт тэтгэж байхыг бэлэгдсэн байдаг тул бүтээн залж шүтэх нь нэн тустай.
Үүний бүтээлийн тарни нь Ум Вээ Шарма Наяа Суухай.
ГОНГОР БУРХАНЫ БУМБА
Гонгорын бумбыг шүтэхийн ач тус нь есөн ариун хүслээр эрдэм билэг, нас, хишиг буяны үйл зөнгөөрөө ундран дэлгэрч, ариун цагаан буян бүгдийг хурайлан асгаруулж байхын бэлэгдэлтэй төдийгүй Гонгор бурханы бумбыг бүтээж залсан газар орон, айл өрх бүхэнд үгүйрэл хоосролын үйл бүхэн хаагдаж, үр удам хойч үе бүхэндээ хишиг буян нь өрнөн дэлгэрч, өөдлөн дэвжиж байхын ерөөлтэй бөгөөд гол утга санаа нь хүмүүний үйлдсэн арван цагаан буяныг цаг алгасалгүй үе удам дамжуулан дэлгэрүүлж байх тул үүнийг бүтээн залсны ач тусаар хотлоороо цаглашгүй их буян хишиг хурайлдаг увдистай.
Үүний бүтээлийн тарни нь Ум Гүрү Маха Гала Хара ни Са Сидин За.
