"Эрдэнэт үйлдвэр" хүнд даацын шинэ автомашинуудаар уулын ажилд хүч нэмлээ
Эрдэнэт үйлдвэрийн Ил уурхайн уулын ажлын өсөн нэмэгдэж буй ачааллыг үүрэх хүнд даацын өөрөө буулгагч КОМАЦУ маркийн 10 автомашиныг ашиглалтад хүлээн авах ёслол өнөөдөр боллоо. Дэлхий даяар аж үйлдвэрийн 4-р хувьсгалын үе өрнөж байгаа энэ үед өндөр хөгжилтэй улс орнууд шинэ үеийн хиймэл оюун, сансрын технологи бүхий техник, тоног төхөөрөмж үйлдвэрлэж, уул уурхайн компаниуд тэдгээрийг үйлдвэрлэлийн бүх шат дамжлагадаа өргөнөөр нэвтрүүлэн, ашиглаж байна.
Эрдэнэт үйлдвэрийн хувьд, нэг талаас олон жил ашиглаж буй техник, тоног төхөөрөмжүүд нь технологийн хувьд хоцорч, ашиглалтын хугацаа дуусаж байгаа, нөгөө талаас уурхай гүнзгийрэхийн хэрээр уул геологийн нөхцөл улам хүндэрч байгаа энэ цаг үед үйл ажиллагаандаа дэвшилтэт, орчин үеийн техник, технологийг нэвтрүүлэх зайлшгүй шаардлага тулгарсан. Технологийн дэвшил, бодит хэрэгцээ, шаардлагыг харгалзан 2019 онд Эрдэнэт үйлдвэрийг 2031 он хүртэл хугацаанд хөгжүүлэх үндсэн чиглэлийг Засгийн газар, Төрийн өмчийн бодлого, зохицуулалтын газраар батлуулсан юм. Эрдэнэтийн-Овоо ордыг ашиглах шинэчилсэн ТЭЗҮ-ийн тайлангаас үзэхэд олон улсын Жорк стандартаар тодорхойлсон одоогийн нөөцөөр Эрдэнэт үйлдвэр цаашид наад зах нь 55 жил ажиллах нь баталгаажсан байна.
2024 оны эхээр зарласан хүнд даацын автотехникийн нийлүүлэгчийг сонгон шалгаруулах тендерт “Трансвест Монголиа” компани шалгарч, KOMATSU HD1500-8 маркийн өөрөө буулгагч 10 автомашин нийлүүлэх гэрээ байгуулж байсан. Гэрээний дагуу эдгээр автомашин бүгд нийлүүлэгдсэн бөгөөд зохих угсралт, тохируулга, зүгшрүүлэлтийн ажил бүрэн хийгдэж, өнөөдрөөс эхлэн байнгын ашиглалтад гарч байна. Уул уурхай, зам, барилгын тоног төхөөрөмжийн үйлдвэрлэлээр дэлхийд тэргүүлэгч “Комацу” фирмийн өөрөө буулгагч эдгээр автомашин нь 142 тонны даацтай, уулын ажлын бүтээл өндөртэй, ашиглалтын зардал багатай, операторын тав тух, аюулгүй байдлыг хангасан, эргэн тойрноо бүрэн харах камер болон радартай, тоног төхөөрөмжийн даацын болон техникийн бусад мэдээллийг хиймэл дагуулын хяналтын системээр дамжуулдаг мэдээллийн технологи бүхий орчин үеийн техник юм. Эдгээр хүнд даацын өөрөө буулгагч автомашинууд дээр ажиллах операторууд нь “Трансвест Монголиа” компаниас зохион байгуулсан танхим болон практик хослуулан сургалтад бүрэн хамрагджээ. Комацу HD-1500-8 загварын автосамосвал нь уулын цул тээвэрлэх ажлыг илүү үр ашигтай, хэмнэлттэй гүйцэтгэх боломжийг олгож байгаа тул цаашид Эрдэнэт үйлдвэрийн өртөг зардлыг бууруулах, бүтээмжийг нэмэгдүүлэхэд чухал үүрэг гүйцэтгэх болно.
