АТГ: Үндэслэлгүй хөрөнгөжсөн 38 албан тушаалтнаас 8 хүнийг яллагдагчаар татжээ
АТГ-аас 81 албан тушаалтны хувийн ашиг сонирхлын болон хөрөнгө, орлогын мэдүүлгийг хянан шалгасан. Хяналт шалгалтыг эрсдэлд суурилан, нуугдмал хөрөнгийг илрүүлэхэд чиглүүлэн явууллаа.
Ингэснээр 38 албан тушаалтан үндэслэлгүй хөрөнгөжсөн байж болзошгүй үйлдэл, мэдээллийг илрүүлэв. Үндэслэлгүй хөрөнгөжих нь Эрүүгийн хуульд заасан гэмт хэрэг тул тэдгээр 38 албан тушаалтныг Мөрдөн шалгах хэлтэст шилжүүлэн шалгуулахад 22 үйлдэлд хэрэг бүртгэлтийн хэрэг нээж, 8 хүнийг яллагдагчаар татаад байна. Хөрөнгө, орлогын мэдүүлгийг хянан шалгах явцад илрүүлсэн бас нэгэн зөрчил нь татвар ногдуулах орлогоо үнэн зөв тайлагнаагүй явдал юм.
Энэ талаарх мэдээллийг шилжүүлэн шалгуулснаар нийт 2.1 тэрбум төгрөгийн татварын зөрчил илэрсэн бөгөөд нөхөн татвар ногдуулах ажлыг холбогдох байгууллага нь хариуцан гүйцэтгэж байна.
