Азийн өвлийн наадам “Өвлийн мөрөөдөл, Ази тивийн хайр” уриан дор болно
Хятадын Харбин хотод 29 жилийн дараа дахин болох эл наадам 11 спортын 64 төрлөөр болох бөгөөд 34 орны 1500 гаруй тамирчин оролцохоод мэдүүлэг өгчээ. Энэ нь оролцогчдын тоогоороо өмнөх наадмуудыг давсан үзүүлэлт юм. Наадамд уулын цана, биатлон, гүйлтийн цана, кёрлинг, уран гулгалт, фристайль цана, хоккей, шорт трек, тэшүүр, снөүборд, цанаар авирах гэсэн спортууд багтаж байна. Цанаар авирах спорт анх удаагаа Азийн өвлийн наадмын хөтөлбөрт багтсанаараа онцлогтой.
Харин манай улсаас биатлон, тэшүүр, шорт трек, уран гулгалт, кёрлинг, уулын цана, гүйлтийн цанын төрөлд 80 тамирчин өрсөлдөхөөр бэлтгэлээ базааж байна. Үүнээс кёрлинг, уран гулгалтаар анх удаа Азийн нөвлийн наадамд оролцож байгаа юм.
Азийн IX өвлийн наадмыг “Өвлийн мөрөөдөл, Ази тивийн хайр” уриан дор зохион байгуулах бөгөөд бэлгэдэл сахиус нь Бинбин болон Нини нэртэй Сибирийн барнууд аж. Тэгвэл уг наадмын медалийн нүүрэн хэсэгт мөсөн зам дээр уян хатнаар гулгаж буй өвлийн спортын тамирчныг Азийн өвлийн наадмын эмблемийн хамт дүрсэлсэн байна. Харин медалийн ард хэсэгт өвлийн наадам зохион байгуулж буй Харбин хотын эргэн тойрон дахь үзэсгэлэнт байгалийг дүрслэн үзүүлжээ.
Ташрамд дурдахад, Харбин хот нь БНХАУ-ын зүүн хойд хэсэгт байрладаг бөгөөд өвлийн аялал жуулчлал, соёлын үйл ажиллагаа тогтмол зохион байгуулдаг учир “Мөсөн хот” хэмээн танигдсан. Өвөлдөө -20 хэм хүртэл хүйтэрдэг. Тус хотод дэлхийн хамгийн том цас, мөсний фестивалийг зохион байгуулж, жил бүр сая сая жуулчин хүлээн авдаг байна.
