Манай улсын 6 мянган стандарт “МОНГОЛЧЛОХ” гэсэн үгэнд бүдэрсээр
Манай Улсад өнөөдрийн байдлаар нийт 6693 стандарт мөрдөгдөж байгаагаас 44.8 хувь нь олон улсын стандартын түвшинд хүрсэн байна. Харин үлдсэн хэд нь яасан нь тодорхой бус. Нэг үгээр хэлэхэд мөрдөгддөггүй “цаасан” стандартууд гэсэн үг.
Ганцхан жишээ дурдья. Сүүлийн хоёр өдөр Төрийн ордонд утааны гэх тодотгол бүхий сонсгол явагдаж байгаа. Энэ үеэр “200 ширхэг угаарын хийн мэдрэгчийг 3.5 тэрбум төгрөгөөр авч, гэр хорооллын айлуудад тараасан ч Монголд мөрдөгдөх стандарт байгаагүй” гэсэн шинжээчийн дүгнэлт бидний байгаа царай, бодит байдлыг харуулж байгаа юм.
Энэ бол ганц угаарын хийн мэдрэгч дээр ч бус өөр олон зүйл дээр байдаг энгийн зүйл мэт болсон үл стандартууд. Угтаа бол стандарт гэдэг тухайн ажил үйлчилгээ, бараа бүтээгдэхүүний чанар, аюулгүй байдлын илэрхийлэл байхаас гадна улс орныхоо, нийгэм ахуйнхаа амьдралтай нягт уялдсан байх ёстой.
Гэтэл манайд амьдралгүй баахан стандартууд байхаас гадна “монголчлох” гэсэн ганцхан үгэнд нөгөө айхтар “стандарт”-ууд нь будаа болж байгаа юм. Ийм байдал хавтгайрсаны үр дүнд өнгөрсөн жил хотын төвд том хэмжээний дэлбэрэлт болж, 260 өрх айлын 1500 орчим хүн өнөөдрийг болтол орох оронгүй жил тойрч буй.
Дээрх хэрэгт мэргэжлийн 12 ажлын хэсэг байгуулагдан дүгнэлт гаргахад нөгөө л “стандарт” мөрдөөгүй, хариуцлагагүй аж ахуйн нэгжийн буруутай үйл ажиллагаанаас болж уг дэлбэрэлт болсон тогтоогдож, шүүхийн шатанд очоод байна.
Угтаа бол бид өдөр тутмын ажил амьдралдаа стандарт гээчийг мөрдөөд хэвшүүлчихвэл олон осол аваар, гэмтэл бэртэл, үхэл хагацлаас сэргийлж чадахсан. Харамсалтай нь хаа сайгүй стандарт шаардлагагүй, зах замбараагүй байдал нэвсийсээр. Ер нь стандарт мөрдөхгүй байна гэдэг бол та шүдээ угаахгүй унтахтай ижил үйлдэл юм. Ийм л жирийн зүйлийг ажил амьдралдаа хэвшил болгож чадаагүй байж бид дэлхийн хөгжил яриад ч хэрэггүй биз ээ.
