Найман орны 121 иргэнийг албадан гаргажээ
Гадаадын иргэн, харьяатын газар өнгөрсөн сард гадаадын 1724 иргэнд визийн зөвшөөрөл, 674 иргэнд виз олгожээ.
Түүнчлэн цахим визийн evisa.mn системээр 24 улсын 2755 иргэнд цахим виз олгосон байна. Мөн эрх бүхий байгууллагын зөвшөөрлийг үндэслэн гадаадын 1217 иргэнд Монгол Улсад оршин суух зөвшөөрөл өгсөн бол 3909 иргэний оршин суух зөвшөөрлийн хугацааг сунгаж, 2029 иргэнийг бүртгэлээс хасав. Төлөвлөгөөт дөрөв, төлөвлөгөөт бус 12 удаагийн хяналт шалгалтаар 43 аж ахуйн нэгж, байгууллага, 651 гадаадын иргэний паспорт, түүнийг орлох баримт бичгийг шалгаж, нийт 18 зөрчил илрүүлэн холбогдох арга хэмжээг авчээ. Мөн зөрчил гаргасан 1767 гадаадын иргэнд Зөрчлийн тухай хуулийн дагуу торгох шийтгэл оногдуулж, нэг аж ахуйн нэгжид албан шаардлага хүргүүлсэн байна.
Түүнчлэн оршин суух зөвшөөрлийн хугацаа нь дууссан боловч Монгол Улсаас гарч явахаас зайлсхийсэн, түр ирэгч нь виз, бүртгэлийн журмыг хоёр буюу түүнээс дээш удаа зөрчиж хуульд заасан хариуцлага хүлээсэн, түр ирэгч визийн хугацааг хэтрүүлсэн зэрэг үндэслэлээр найман улсын 121 иргэнийг албадан гаргалаа.
2025 оны нэгдүгээр сарын байдлаар Монгол Улсад албан болон хувийн хэргээр оршин суух бүртгэлтэй 31092 гадаадын иргэн байна. Үүнээс хөдөлмөр эрхлэгч 12852, хөрөнгө оруулагч 3816, гэр бүлийн болон хувийн бусад зорилгоор 4812, цагаач 1828, шашны зорилгоор 116, албан хэргээр 639 гадаадын иргэн амьдарч байгаа аж.
