Жүдочид Тбилисийг зорилоо
Олон улсын жүдо бөхийн холбооноос зохион байгуулдаг “Их дуулга” ангиллын дөрөв дэх цуврал тэмцээн Гүржийн Тбилиси хотод болно. Энэ сарын 21-нд эхлэх тус тэмцээнд 53 орны 400 гаруй тамирчин зодоглохоор мэдүүлэг өгчээ.
2025 он гарснаас хойш зохион байгуулсан “Их дуулга” ангиллын тэмцээнүүдээс хамгийн олон оролцогчтой нь Тбилисийнх болж байна. Парист 50, Бакуд 36, Ташкентад 23 орны жүдочид зодоглосон юм.
Тэгвэл энэхүү тэмцээнд манай улсаас ахлах дасгалжуулагч У.Эрдэнэбаатар, дасгалжуулагч П.Нямлхагва, Ч.Болдбаатар, Г.Болдбаатар нарын удирдлагад эрэгтэй 11, эмэгтэй есөн тамирчин барилдахаар өнөөдөр өглөө Тбилисийн зүг хүлгийн жолоо заллаа. Дахин сануулахад, эрэгтэйчүүдийн 60 кг-д К.Ёолк, Э.Ариунболд, 66 кг-д Ё.Басхүү, Ө.Бямбасүрэн, 73 кг-д О.Уранбаяр, Л.Анхзаяа, 81 кг-д О.Шинэбаяр, 90 кг-д Ц.Ган-Эрдэнэ, Б.Мөнхбаяр, -100 кг-д Б.Хүдэрчулуун, +100 кг-д Б.Гончигсүрэн нар барилдана.
Харин эмэгтэйчүүдээс 48 кг-д Г.Наранцэцэг, Ж.Анударь, 52 кг-д М.Нандин-Эрдэнэ, Ц.Гал-Од, 57 кг-д М.Ичинхорлоо, Т.Ариунзаяа, 70 кг-д Д.Есүй, -78 кг-д А.Дуламсүрэн, +78 кг-д А.Адъяасүрэн нар барилдана. Сонирхуулахад, 2021 онд зохион байгуулсан Тбилисийн “Их дуулга”-аас Хөдөлмөрийн баатар, гавьяат тамирчин М.Уранцэцэг, гавьяат тамирчин Ц.Цогт-Очир нар алт, олон улсын хэмжээний мастер Г.Хэрлэн, Г.Алтанбагана нар хүрэл медальтай эх орондоо ирж байв. 2022 онд оролцоогүй бол 2023 оны тэмцээнд олон улсын хэмжээний мастер Б.Эрдэнэбаяр түрүүлж, гавьяат тамирчин Ё.Басхүү, олон улсын хэмжээний мастер Б.Гончигсүрэн нар мөнгө, Г.Наранцэцэг хүрэл медаль хүртэж байв.
Тэгвэл өнгөрсөн жил манай 12 тамирчин оролцсон ч медальгүй ирсэн юм.
