Дэлхийн тэрбумтнууд нэг өдрийн дотор 208 тэрбум ам.доллар алджээ

АНУ-ын Ерөнхийлөгч Дональд Трамп гадаадын бүх бараанд татвар ногдуулснаас үүдэн дэлхийн зах зээлд уналт болсны дараа манай гаргийн хамгийн чинээлэг 500 хүний нийт хөрөнгийн хэмжээ ганцхан хоногийн дотор 208 тэрбум ам.доллароор багассан тухай "Bloomberg" агентлаг мэдээлжээ. 

“Bloomberg Billionaires Index”-ийг (BBI) гаргаж эхэлснээс хойших 13 жилийн хугацаанд тэрбумтнуудын нийт хөрөнгө нэг өдрийн дотор хамгийн их хэмжээгээр буурсан дөрөв дэх тохиолдол, "COVID-19" цар тахлын үеэс хойших хамгийн их хэмжээгээр унасан анхны тохиолдол нь энэ болжээ. Жагсаалтад багтсан тэрбумтнуудын талаас илүү хувийнх нь хөрөнгө дунджаар 3.3 хувиар буурсан байна. 

Meta корпорацын тэргүүн Марк Цукерберг, Amazon компанийг үүсгэн байгуулагч Жефф Безос зэрэг Америкийн тэрбумтнуудын хөрөнгө хамгийн ихээр буурсан бол Мексикийн тэргүүн баян Карлос Слим татварын сөрөг нөлөөлөлд өртөөгүй цөөн хэдэн тэрбумтнуудын нэг болжээ. 

Хамгийн их алдагдал хүлээсэн тэрбумтан бол М.Цукерберг юм. "Meta" компанийн хувьцаа пүрэв гаргийн арилцааны явцад 9 хувиар унаснаар түүний хөрөнгө 17.9 тэрбум ам.доллароор буурлаа. "Amazon"-ы хувьцаа мөн 9 хувиар унаж, үүсгэн байгуулагч Безосын хөрөнгө 15.9 тэрбум ам.доллароор багасжээ. "Tesla" компанийн хувьцааны ханш 5,5 хувиар унасны улмаас гүйцэтгэх захирал Илон Маск 11 тэрбум ам.долларын алдагдал хүлээжээ. 

Дэлхийн 185 улс орон, нутаг дэвсгэрээс нийлүүлж буй бараа бүтээгдэхүүнд татвар ногдуулахаар шийдвэрлэснээ Д.Трамп дөрөвдүгээр сарын 2-нд мэдэгдсэн юм. Тэрбээр татварын доод хэмжээг 10 хувиар тогтоож, улс орнуудад тус тусад нь тариф ногдуулсан юм. Эл шийдвэрийг танилцуулсны дараа АНУ-ын зах зээл уналтад орсон байна.