Хүүхдийн ууттай бэлгэнд агуулагдах сахарын агууламж 63 ширхэг ёотонтой тэнцэж байна
Удахгүй Эх үрсийн баяр болно. Ээж аавууд үр хүүхдээ наад зах нь ууттай бэлгээр баярлуулах нь ердийн соёл. Тэгвэл хүүхдийн ууттай бэлгэнд агуулагдах сахарын агууламжийг тооцож үзэхэд 63 ширхэг ёотонтой тэнцэж байгаа бөгөөд энэ нь хүүхдийн өдөрт авах сахарын хэмжээнээс даруй 10 дахин их байгааг мэргэжилтэн хэлж байна. Тухайлбал, хүнсний дэлгүүрүүдэд дундажаар 20,000 төгрөгийн үнэтэй бэлэг 8-9 төрлийн бүтээгдэхүүнтэй байна. Үүнээс сахарын агууламжийг тооцож үзэхэд:
- Ундаа 44гр
- Үрлэн чихэр 40гр - Резинэн чихэр 42гр
- Шокаладтай шаржигнуур 10гр
- Зөөлөн амттан 76гр
- Хөөсөн чихэр 44гр
- 2ш иштэй чихэр нийлээд 20гр, тус тус сахарын агууламжтай байжээ.
Энэ нь нэг уут бэлэг нийт 316гр сахар агуулж байгаа гэсэн үг юм. Гэтэл хүүхэд ч бай насанд хүрсэн хүн ч бай, өдөрт дундажаар 25гр сахар хэрэглэх нь зохистой гэж үздэг байна. Мөн нэг өдөрт сахар их хэмжээгээр агуулсан бэлэг идсэнээр шүдний өвчлөл, амны хөндийн эрүүл мэндэд сөрөг нөлөөтэй байдаг байна.
Тиймээс баяр хараахан болоогүй байгаа эдгээр өдрүүдэд эцэг, эхчүүд хүүхэддээ уут дүүрэн хор авч өгөхөөс сэргийлэхийг зөвлөж байна.
