Австрийн соёлын форумын хүрээнд хөгжмийн удирдаач, төгөлдөр хуурч, Маттиас Флецыбергер Монголд айлчлан ирлээ
БНХАУ-ын Бээжин хот дахь Австрийн Элчин сайдын яамны санаачилгаар Австрийн соёлын форумын хүрээнд хөгжмийн удирдаач, төгөлдөр хуурч, Маттиас Флецыбергер 2025 оны 05-р сарын 18-28-ны өдрүүдэд Монголд айлчлан ирж, тоглолт хийх бөгөөд бэлтгэл ажилдаа ороод байна.
Маттиас Флецыбергер нь Австрийн Вена хотод төрсөн ба 5 настайгаасаа төгөлдөр хуурч мэргэжлээр Вена хотын урлагийн сургуульд суралцан төгссөн ба дэлхийн нэр хүндтэй, өндөр зэрэглэлийн олон уралдаанд түрүүлсэн алдартай төгөлдөр хуурч бөгөөд концертын болон дуурийн удирдаач мэргэжлээр суралцан төгсөж, олон дуурь болон симфонийн бүтээлүүдийг Вена хотдоо болон олон улсад туурвисан туршлагатай уран бүтээлч аж. Тухайлбал • Чех Прага хотын Дуурын театр • АНУ, Канад (Walt Disney hall, Montreal, Toronto зэрэг хотуудын филармони) • София филармони • Швейцар улс (St.Gallen Theater) • БНСУ (Seoul Arts Center) • Япон (Bunka Kaikan Tokyo) • БНХАУ (NCPA Beijing, Oriental Art center Shanghai) зэрэг алдартай газруудад амжилттай ажиллаж байсан.
Мөн тэрээр 2015 онд анх удаа Монголд ирж, УДБЭТ-ын симфони найрал хөгжимчид, дуурийн дуучид болон төгөлдөр хуурчидтай ажиллаж байсан туршлагатай удирдаач юм. Одоо Австри улсын ерөнхийлөгчийн айлчлалыг угтан, Австри улсын ерөнхийлөгчийн тамгын газрын соёлын асуудал эрхэлсэн зөвлөх, БНХАУ-д Австри Улсаас суугаа Элчин сайдын яамны Соёлын консул Хатагтай Гүдрүн Хардиман Поллросс (GUDRUN HARDIMAN-POLLROSS)-ын урилгаар хоёр дахь удаагаа манай улсад ирж мэргэжлийн урлагийн байгууллагууд болох Улсын Дуурь Бүжгийн Эрдмийн театр, АЖ, ТШ Ц.НАМСРАЙЖАВЫН нэрэмжит Улсын Филармони, Монгол Улсын Консерватори зэрэг байгууллагуудын уран бүтээлчидтэй хамтран ажиллаж байна. Удирдаач, төгөлдөр хуурч Маттиас Флецыбергер нь 2025 оны 05-р сарын 19, 20-ны өдрүүдэд УДБЭТ-ын гоцлол болон найрал дуучдад мастер класс өгч ажиллаа.
Мөн тэрээр 2025 оны 05-р сарын 25-ны өдөр дэлхийн сонгодог бүтээлүүдийн дээжисээс УДБЭТ-ын театрын уран бүтээлчидтэй хамтран эшиглүүлэх гэж байна.
