МАРАФОН ЯАГААД “БҮҮМ” БОЛОВ?
Марафон гүйлт нь хүнийг залуужуулж, хөгшрөлтөөс сэргийлж, сэтгэцийн эрүүл мэндийг сайжруулдаг нь нэгэнт тодорхой болж.
Энэ сарын 31-нд Дархан хотод марафон гүйлтийн тэмцээн, 6 сарын 6-нд Сэлэнгэ аймаг, 6 сарын 22-ноос 7 сарын 2-ны хооронд хэт холын Говь олон улсын марафон, 7 сарын 25-26-нд Баянхонгор аймагт УАШТ, 9 сарын 20-нд Итгэл Найдвар Боломж бүх нийтий марафон Улаанбаатар хотод тус тус болно.
Марафон гүйлт эрүүл мэндэд ямар ашиг тустай вэ?
- Цусны судас 3.9 насаар залууждаг
Марафон гүйлт нь цусны судсыг 3.9 насаар залуужуулдаг гэсэн судалгаа бий. Лондон дахь Гэгээн Бартоломьюгийн эмнэлгийн дэргэдэх Зүрх судасны шинжлэх ухааны судалгааны хүрээлэнгээс зүрх судасны өвчнөөр өвчлөөгүй 37 насны 138 эрүүл саруул насанд хүрэгчдэд судалгаа хийжээ. Оролцогчид бүгд марафон гүйлтийн туршлагагүй байсан ч марафонд оролцохоосоо өмнө 6 сар орчим бэлтгэл хийж, дараа нь марафонд оролцсон. Судалгааны баг марафонд оролцохоос 6 сарын өмнө болон дараа нь эрүүл мэндийн үзлэг хийсэн. Ингэснээр оролцогчдын судасны нас дунджаар 3.9 насаар залуужсан байна. Ялангуяа марафоны хугацаа нь урт, ахимаг насны хүмүүсийн судас нь илүү залуужсан байв. Судалгааны багийнхан цусны даралт ихсэх, зүрхний шигдээс зэрэг зүрх судасны өвчтэй хүмүүс марафон гүйлтийн үед эдгээр өвчлөл нь эрүүлждэг гэж мэдэгджээ.
- Хөгшрөлтийг түр зогсооно
Мөн марафон нь хөгшрөлтийг түр зогсоодог гэсэн судалгаа байдаг. Италийн Ромын их сургуулийн профессор Габриэла Марфегийн баг 10 сонирхогч марафончдыг 26 миль (42.195 км бүтэн) гүйсний дараа цусны дээж авчээ. Судалгааны багийнхан марафонд гүйгээгүй 6 хүнээс цус цуглуулж, тэднийг харьцуулсан байна. Үүний үр дүнд бүтэн гүйсэн 10 хүн бие махбодид байгалийн жамаар үүсдэг цусан дахь эсийн “программчлагдсан үхэл” буюу апоптоз үйл явцыг түр зогсоосон байв. Програмчлагдсан эсийн үхэл гэдэг нь дотоод болон гадаад дохионы хариуд эсүүд ургах болон хуваагдахаа больж, өөрөө үхэх үйл явцыг хэлнэ. Судалгааны багийнхан урт хугацааны марафон гүйлт нь араг яс, зүрхний булчингийн эд эсийг эрүүлжүүлж, эсийн үхлийг тасалдуулж чаддаг гэж батлав.
- Сэтгэцийн эрүүл мэнд сайжирна
Мөн марафон нь сэтгэцийн эрүүл мэндийг сайжруулдаг. Дун А их сургуулийн Анагаах ухааны коллежийн Сэргээн засах эмчилгээний тэнхимийн судалгааны баг марафон гүйлтийн клубын 52 гишүүн (37 эрэгтэй, 15 эмэгтэй) болон нас, биеийн галбир ижил төстэй энгийн 52 хүнээс сэтгэл зүйн сорил авсан байна. Судалгааны үр дүнгээс харахад марафон гүйлтийн клубын гишүүдийн сэтгэл зүйн оноо 100-аас 81.3, гишүүн бус хүмүүс 71.7 буюу 10 оноогоор бага байна. Ноттингемийн эрүүл мэндийн индекст марафон гүйлтийн клубын гишүүд нийгмээс тусгаарлах 6.6 оноо, сэтгэл хөдлөлийн хариу үйлдэл 3.4 оноо авсан нь ерөнхий хяналтын бүлгийнхээс 2-3 дахин бага байна. Ноттингемийн эрүүл мэндийн индекс 0 оноотой ойртох нь амьдралын чанар өндөр болно гэж үздэг. Судалгааны багийнхан марафонд гүйхэд эндорфин ялгарч, стресс тайлагддаг, холын зайн дасгал учраас уралдаан дууссаны дараа оюун санааны амжилт өндөр байдаг төдийгүй олныг хамарсан үйл ажиллагаанд хамрагдах нь сэтгэцийн эрүүл мэндийг сайжруулдаг гэж тайлбарлав.
Мөн марафон гүйлт нь дархлаа сайжруулж, биеийн өөх багасгаж, зүрх уушигны тэсвэр тэвчээрийг нэмэгдүүлдэг. Гэхдээ буруу байрлалтай гүйвэл бэртэж болзошгүй тул болгоомжтой байх хэрэгтэй. Өвдөг, хөлний өвчнөөс урьдчилан сэргийлэхийн тулд гүйхээсээ өмнө хангалттай сунгах хэрэгтэй. Хэрэв таны үе мөч ихэвчлэн сул байдаг бол хамгаалагч эсвэл тууз зүүж гүйх нь илүү аюулгүй байдаг. Мөн биеийн хүч, биеийн байдалдаа тохируулан гүйлтийн эрчмийг тохируулах нь чухал.
Илүү залуужиж биеийн өвчлөлөөсөө салмаар байвал яг одоо гараад гүйгээрэй.
