Оффисийн төрсөн өдөр үеэ өнгөрөөв
Хурлын ширээгээ тойрч зогсоод хэдэн төрлийн зууш, оргилуун дарс, хүний тоогоор хуваагаад идэх боломжит хэмжээтэй бялуу зэргийг тавиад СЮРПРАЙЗ хэмээн хамтран ажилладаг нэгнээ баярлуулдаг хэв маяг үеэ өнгөрөөж байна.
Оффисийн үдэшлэг бол хамт олныг нягтаршуулах чухал арга хэрэгсэл гэж үздэг боссуудын үе өнгөрч цахим мэндчилгээ, хүссэнээ сонгох эрх нь нээлттэй байдаг бэлгийн карт компаниудын ажилтнууддаа төрсөн өдрөөр нь илгээдэг гол зүйл болж.
Цар тахал үүнд гол нөлөө үзүүлсэн гэдгийг олон улсын соёл судлаачид хэлж байна. Өөрийнхөө орон зайг хамгаалах, хэдэн нас хүрч байгаагаа бусдад мэдэгдэхийг хүсэхгүй байх, анхаарлын төвд орохгүй байх гэх мэт олон шалтгаанаар оффисийн төрсөн өдрөөс зугтагсад олон болсон нь нэгэн цагт ёс юм шиг хийгддэг байсан энэхүү уламжлалаас татгалзах шалтаг болж байна.
Сошиал сувгууд дээрээ төрсөн өдрийнхөө мэдээллийг ил тод харуулдаг байсан хүмүүс оффисийн ширээн дээр нь чимэглэл хийж, лаа үлээлгэж олны анхааралд өртүүлсэн учраас ахин төрсөн өдрийн тохиргоог асаагаагүй гэдгээ хэлсэн байна.
Ангиараа, хамт олноороо, нийтээрээ баяр тэмдэглэх дуртай Монголчууд бид нэг нь нийтийн төлөө, нийт нь нэгнийхээ төлөө зарчмаар оффисийн төрсөн өдрүүдийг таслалгүй тэмдэглэсээр л байх болов уу... Тухгүй мэдрэмжийг хэн нэгэндээ өгч байгаа эсэхийг анзаарахыг хүсье!
