Өнөөдөр тамхигүй өдөр тохиож байна
Жил бүрийн энэ өдрийг дэлхийн тамхигүй өдөр болгон тэмдэглэж байна.
1988 онд Дэлхийн эрүүл мэндийн ассамблейн 32 дугаар чуулганаас тамхины хэрэглээ болон тамхины утаанаас үүдсэн байгаль орчин, эдийн засагт үзүүлэх хор хөнөөл, гамшгаас хойч үеийнхнийг хамгаалах зорилгоор тавдугаар сарын 31-ний өдрийг “Тамхины эсрэг дэлхийн өдөр” болгон зарласан бөгөөд жил бүр тодорхой уриатай тэмдэглэдэг. Энэ жилийн хувьд“Тамхигүй хойч үеийн төлөө тамхины үнэнийг илчилье!” уриан дор тэмдэглэж байна. Тамхины хор нөлөөг таниулах зорилгоор өсвөр үе, залуучуудад зориулсан үйл ажиллагааг зохион байгуулах аж.
Тамхины хэрэглээ дэлхий даяар цар тахлын хэмжээнд хүрсэн бөгөөд жил бүр тамхидалтын улмаас найман сая гаруй хүн амь насаа алдаж байгаа бөгөөд тэдний 1.2 сая нь дам тамхидалтын шалтгаантай байна. Эдгээр тохиолдлын ихэнхийг хөгжиж буй улс орны 30-69 насны хүн ам эзэлж байгаа юм. Монгол Улсын хүн амын 27.1 хувь тамхи татдаг гэсэн судалгаа бий. Үүний 96.8 хувь нь тамхийг өдөр бүр тогтмол татаж байна. Түүнчлэн хоёр эрэгтэй хүн тутмын нэг нь тамхи татдаг бол 20 эмэгтэй тутмын нэг нь тамхи татдаг ажээ. Мөн өсвөр үеийнхний 61 хувь нь тамхи татаж үзсэн байдаг. Энэ тоо жил ирэх тусам нэмэгдэж байгаа нь мэргэжилтнүүдийн санааг зовоосон нэг асуудал болж байна.
Манай улсад төдийгүй дэлхий даяар нас баралтын тэргүүлэх шалтгаан болоод байгаа зүрх судасны өвчин, хорт хавдар, амьсгалын замын архаг өвчин, чихрийн шижин зэрэг сэргийлж болох халдварт бус өвчнүүдийн хамгийн том шалтгаан нь тамхидалт гэдгийг эрүүл мэндийн байгууллагынхан онцолж байгаа юм.
