АН, Үндэсний эвсэл хоёр цаашид СӨРӨГ ХҮЧНЭЭР ажиллана

Ерөнхий сайд Г.Занданшатарын Засгийн газар өнөөдрөөс ажлаа эхэлж байна. Хэд хоногийн хугацаанд таамаг дундуур хөвөрч байсан сайд нарын нэрс, ажил үүргийн хувиарлалт тодорхой боллоо. Эл Засгийн газарт ИЗНН, ХҮН намууд хамтарч ажиллахаар улс төрийн шийдвэр гаргалаа.

Харин АН болон Үндэсний эвсэлүүд сөрөг хүчнээр ажиллах нь.

Уг нь Ерөнхий сайд Г.Занданшатар ИЗНН, ХҮН, Үндэсний эвсэлд Засгийн газартай хамтарч ажиллах санал хүргүүлсэн. Ингээд ХҮН намд хоёр суудал, ИЗНН-д нэг суудал, Үндэсний эвсэлийн тэргүүн Н.Номтойбаярт Том төсөл, дэд бүтэц хариуцсан шадар сайд гэх урьд хожид сонсогдож байгаагүй санал тавьсан аж. Гэтэл Н.Номтойбаяр гэдийчихсэн.

Мөн үүнтэй зэрэгцээд түүний хамаарал бүхий МАК компанийн эзэмшдэг Нарийнсухайт ордын тодорхой хувийг Баялагийн санд төвлөрүүлэх саналд "хэлэлцээр хийхгүй" гэх хариуг өгсөн. Энэ асуудалтай ч мөн холбоотой байх магадлалтай.

Ямартай ч Н.Номтойбаяр ИЗНН, ХҮН намуудаас ялгамжтайгаа харуулж улс төрийн даацтай шийдвэр гаргалаа гэж олон нийт харж байна.

Өмнө хэд хэдэн удаа Үндэсний эвсэл сөрөг хүчний үүргээ гүйцэтгэнэ хэмээн мэдэгдэж байсан. Тэрбээр хэлэхдээ, “УИХ-ын сонгуулиар хамгийн их санал авсан улс төрийн намууд нэгдэж хамтарсан засгийн газар байгуулсан. Манай Үндэсний эвсэл сонгуулиар 330.000 мянган санал авсанаар монголын төрд хүлээн зөвшөөрөгдсөн. Цаашлаад ирэх дөрвөн жил бид энэ гурван намын эсрэг сөрөг хүчныхаа ажлыг хийнэ” гэж байв.

Ингээд Хамтарсан Засгийн газар цаашид АН, Үндэсний эсвэл гэх хоёр сөрөг хүчинтэй нүүр тулах нь.

М.Үүрийнтуяа