Сард 1 тэрбум төгрөгийн орлого олж байгаа SOCIALPAY PARK-ийн эзэн хэн бэ?

Энэ зун хотын залуусын хамгийн их зочилж буй газруудын нэг бол Socialpay Park буюу Үндэсний соёл амралтын хүрээлэн болоод байна. Учир нь  залуусын үе үеийн дурсамжийг сэдрээсэн дуутай хамтлаг, дуучдын тоглолтууд энд ар араасаа цуварч буй.   Өнгөрсөн жилүүдэд ихэнхи тоглолтууд Төв цэнгэлдэх хүрээлэнд болж байсан бол энэ жилээс SocialPay Park дээр зохиогддог моод дэлгэрчээ. Тухайлбал, Guys,  All in hit,  One stage зэрэг тоглолтууд болсон бол үргэлжлээд, Хурд, Камертон зэрэг хамтлагууд нэг оройг фэнүүдтэйгээ хамт өнгөрөөнө.  

Уг талбайг нэг орой түрээслэхэд Хамтлаг, дуучид 250 сая төгрөг төлдөг гэх мэдээлэл бий. Тэгвэл энэхүү SocialPay Park-ийн ЭЗЭН ХЭН БЭ?  

Одоогоос гурван жилийн өмнө Үндэсний соёл амралтын хүрэээлэн буюу Паркийн газрыг устгаж сүйтгэж байгаа талаар мэдээлэл цацагдаж улмаар “Хүүхдийн паркаа авръя” гэх хөдөлгөөн хүртэл өрнөж байсан удаатай.

Тухайн үед Голомтын гэх тодотголтой Д.Баясгалан Үндэсний соёл амралтын хүрээлэнг  “Диснейлэнд” болгоно гэж төсөл танилцуулж улмаар газраа MCS зэрэг нэр бүхий компаниудад өндөр үнээр зарсан гэх мэдээлэл ч нийгмийг шуугиулж байсан юм.

Одоо тэгвэл Үндэсний соёл амралтын хүрээлэнгийн 35.8 га газрын 26 хувийг хотын захиргаа, үлдсэн 74 хувийг Д.Баясгалангийн “Бодь Интернэшнл” ХХК эзэмшдэг.

SocialPay гэх нэрнээс нь анзаарахад Голомтынх гэдэг нь тодорхой гэмээр. Энэ жилээс Паркын зүүн хойд жигүүрт байрлах энэхүү Socialpay park дээр зуны бүх шоу тоглолтууд болж мөнгийг ёстой л хүүлж байна.

Ингэж хэлсэний учир нь, энэ зуны томоохон хэмжээний бүх шоу тоглолтууд долоо хоног алгасахгүйгээр энд болж байна. Цаашид ч  5-6 тоглолтууд хүлээгдэж буй.  

Түрээсийн үнийг судалбал, хамтлаг дуучид нэг орой тоглолтоо хийхэд 150-250 сая төгрөг төлдөг байна. Үүнд техник, тоног төхөөрөмжүүд бүгд багтдаг гэнэ. Тооцож үзвэл, энэхүү газар сард 1 тэрбум төгрөгний орлого олж байгаа юм. Ойролцоогоор 10.000 орчим хүний багтаамжтай байна.

Үндэсний соёл амралтын хүрээлэн нь анх 1965 онд Хотын соёл амралтын парк нэртэйгээр байгуулагдаж байв. 1991 оноос Монголын Үндэсний соёл амралтын хүрээлэн болж цаашлаад 2005 оноос одоогийн “Үндэсний соёл амралтын хүрээлэн” ХХК нэртэй болсон түүхтэй.