Сурвалжлага: Туулын бургасыг хядаж Зайсангийн айлуудыг дулааны шугаманд холбоно!
Энэ сарын 18-наас эхлэн /2025.06.18/ Хан-Уул дүүргийн нутаг дэвсгэрт Туул голын эрэг дагуу байрлах бургасыг тайрч, хядаж байна гэсэн иргэний мэдээлэл манай редакцид ирсэн юм. Мэдээллийн дагуу очиход Дархан цаазат Богдхан уулын хойд хормой, хатан Туулын хэвлийг цөмлөж, бургасыг нь хядаж тэндээ дулааны шугам барих ажлыг эхлүүлсэн байлаа. Улаанбаатар хотын үе үеийн дарга нарын замбараагүй газар олголт, хувийн харш, хаус хотхон босгосон хууль завхруулагчдаас үүдэж Дархан цаазат уул, ус ургамал ногоонууд хядагдаж, үгүй болж буй. Хан-Уул дүүргийн 11-р хороонд байрлах Bella vista хотхоны чанх ард Туул голын эрэг дагуу очиход 5-6 ажилчид бургаснуудыг тайрч байлаа.
Тэд Туул голоос ердөө тав, зургаан алхамын урд байв. Тэнд ямар ажил явагдаж байгаа талаар тодруулахад, “Дулааны шугам тавих гэж байгаа юм. Та нар зүүн тийш жаахан алхвал эхнээсээ дулааны шонгууд боссон. Зайсангийн айлуудыг бүгдийг нь дулаанаар хангах гэж байгаа юм. Энд төвлөрсөн дулааны шугам огт байхгүй энэ хавийн айлууд бүгд Л.Гүндалайгийн хувийн шугамнаас ус, дулаанаа авдаг байсан” гэх хариултыг өгөв. Харин зарим ажилчид, “Бид өдрийн ажилчид учраас тодорхой мэдээлэл байхгүй байна.
Ямартай ч дулааны шугам татах гэж байгаа учраас эдгээр бургаснуудыг тайрч, замыг нь чөлөөл гэж үүрэгдсэн, дарга нараас асуу” гэлээ. ”Бид үргэлжлүүлэн, албаны хүмүүсээс мэдээллийг тодруулахаар цааш алхав. Экскаватор машины мөр тод зам татуулж хажууд нь тайрсан бургасууд ярайж буй нь эмгэнэлтэй харагдана. Угтаа Богд Уул, түүний хойд хормойд орших Туул гол бол дархан цаазат газар. Гэвч эрх мэдэлтэй албан тушаалтнууд Туулын бургасыг хядаж орон сууц, хауснууд барих, цаашлаад ус дулаанаар боодог гишүүд ч бий аж.
Тухайлбал, УИХ-ын гишүүн Л.Гүндалай Зайсангийн газраас хөрөнгөжсөн нэгэн. Одоогоос хэдэн жилийн өмнө тэрбээр, “Надад мөнгө төл эсвэл хэн ч дулаан авахгүй” гэж олон мянган оршин суугчдыг боож хааж байна гэх мэдээлэл ч мөн гарч байсан удаатай. Энэ ажлын талаар талбайн инженер н.Лхагвасүрэнгээс тодруулахад, “Зайсангийн зүүн хэсгийг төвлөрсөн дулаанаар хангах ажил явагдаж байгаа. Энэхүү ажил Дэлхийн банкны санхүүжилтээр хийгдэж байгаа бөгөөд Байгаль орчин, уур амьсгалын өөрчлөлтийн яамны дүгнэлтээр холбогдох байгууллагуудаас зөвшөөрөл авч гуравдугаар сарын 30-нд гэрээ байгуулагдсан. Улмаар тавдугаар сарын 15-наас барилга угсралтын ажил хийгдэж байгаа.
Мод тайрах ажил энэ сарын 12-ноос эхэлсэн. Бид бага моднуудыг шилжүүлж өөр газар суулгана. Харин том бургаснууд бол тайрагдаж байгаа. Энэ ажил 12 дугаар сарын 30-нд дуусах гэрээтэй, гэхдээ бид 9 сар буюу дулаан халаалтын үе эхлэхээс өмнө ашиглалтанд оруулахаар ажиллаж байна” гэлээ. Улаанбаатар хот гучаад жилийн өмнө Сэлбэ, Дунд, Улиастай болон Туулын гэх мэт гурав, дөрвөн голтой байсан. Тэд ээлжлэн нүд аньсаар Туул гол л тунаж үлдсэн байдаг. Гэтэл одоо эрэг дагуу байрлах бургасуудыг нь хядаж, урсаж буй усыг нь бохирдуулж, дархалж хамгаалах бус цаазалж буй нь эмгэнэлтэй.
М.Үүрийнтуяа
