Гааль, татварын байгууллагын үйлчилгээ, санхүүгийн цахим системүүд нэгдсэн үйл ажиллагаанд орж, хэрэглээ ашиглалт нэмэгдэж байгаа тул дэд бүтэц, хөрөнгө оруулалтын асуудлыг хамтран шийдвэрлэнэ
"Гааль, татварын байгууллагын цахимжилт түүний үр нөлөө ба иргэн хуулийн этгээдийн цахим системтэй холбоотой санал, хүсэлт, гомдлыг шийдвэрлэх арга зам” сэдэвт хэлэлцүүлэг өнөөдөр /2025.06.24/ боллоо.
Авлигатай тэмцэх газрын Урьдчилан сэргийлэх, соён гэгээрүүлэх хэлтсээс зохион байгуулсан уг хэлэлцүүлэгт Сангийн яам, Гаалийн ерөнхий газар, Татварын ерөнхий газар, “Санхүүгийн мэдээллийн технологийн төв” УТҮГ-ын төлөөлөл оролцож санхүүгийн цахим системийн өнөөгийн байдал, хэвийн ажиллагаа, сайжруулалт, гарч буй хүндрэл бэрхшээлийг хэлэлцэж цаашид авах арга хэмжээний талаар зөвлөлдлөө.
Төрийн байгууллагуудын хувьд гарч байгаа авлига, хүнд сурталтай холбоотой эрсдэлүүдийг шийдвэрлэх олон арга замын нэг нь үйлчилгээг цахим хэлбэрт шилжүүлэх юм. Энэ хүрээнд сангийн яамны харьяа байгууллагуудын уялдаа холбоог сайжруулах, гарч буй хүнд суртал, хүндрэл бэрхшээлийг оновчтой тодорхойлж хамтран шийдвэрлэх нь өнөөдрийн хэлэлцүүлгийн гол зорилго юм.
Санхүүгийн системүүд нэгдсэн байдалд орж хэрэглээ ашиглалт нэмэгдсээр байгаа энэ үед дэд бүтэц, хөрөнгө оруулалтын асуудлыг хамтран шийдвэрлэдэг байх нь чухал байгааг “Санхүүгийн мэдээллийн технологийн төв”-ийн мэргэжилтнүүд онцоллоо. 2026 оноос төсвийн саналаа нэгдсэн байдлаар гаргаж ажиллахаар дээрх гурван байгууллага зөвшилцөлд хүрчээ.
2025 оны 6-р сарын 23-ны байдлаар Гаалийн лавлах утсанд цахим систем, үйлчилгээтэй хамааралтай 1244, Мэдээллийн технологийн газар 2446 гомдол ирсэн байна. Тухайлбал, татварын систем НӨАТ татагдахгүй 383, тээврийн зардал е-баримт 81, баркод татагдахгүй 67, гэрээ бүртгэлтэй холбоотой 60 гомдол бүртгэгдсэн байна.
Аж ахуйн нэгж, иргэд 3-4 байгууллагатай ээлжлэн холбогдож, өөрт гарсан асуудлыг аль байгууллага хариуцдаг талаарх ойлголтгүй байгаа нь шийдвэрлэх гол хүндрэлүүдийн нэг бөгөөд иргэдэд мэдээлэл өгөх үйл ажиллагааг хиймэл оюун ухаан ашиглаж шийдвэрлэх боломжтой талаар мэргэжилтнүүд санал хэллээ.
