Монгол, Хятадын хилийн эрүүл ахуй, хорио цээрийн хамтын ажиллагааны хуралдаан боллоо
Монгол Улсын Гаалийн ерөнхий газар, БНХАУ-ын Гаалийн ерөнхий газар хооронд 2022 онд байгуулсан “Хилийн эрүүл ахуй, хорио цээрийн хамтын ажиллагааны протокол”-ын хэрэгжилтийг хангуулах хүрээнд 2 талын хилийн боомтуудад хил дамнан тархах зоонозын халдварт өвчний хяналт сэргийлэлт, хамтын ажиллагааны хуралдаан 2025 оны 05 дугаар сарын 14-ний өдрөөс 16-ны хооронд БНХАУ-ын Эрээн хотноо зохион байгуулагдлаа.
Хуралдаанд Монгол Улсын талаас Гаалийн Ерөнхий Газрын Хорио цээрийн хэлтсийн гаалийн улсын ахлах байцаагч Т.Төмөрбаатар, гаалийн улсын байцаагч С.Болормаа, Замын-Үүдийн Гаалийн газрын Хорио цээрийн албаны дарга Ц.Болдоо, ЗӨСҮТ-ийн захирал Б.Амгаланбаяр нар болон ЗӨСҮТ, ХӨСҮТ-ийн мэргэжилтнүүд оролцлоо.
БНХАУ-ын талаас Хөх хотын Гаалийн газрын орлогч дарга Хуан Вэйдун, Хөх хотын Гаалийн газрын Эрүүл ахуй, хорио цээрийн газрын дарга Жан Шэн, ӨМӨЗО-ны Өвчин эмгэгээс урьдчилан сэргийлэх төвийн дарга Жан Жүн Бинь, Эрээн хотын Засгийн газрын орлогч дарга Жөү Жинрань, Эрээн хотын Гаалийн газрын орлогч дарга Жау Хүн шань нар болон бусад албаны хүмүүс оролцов.
Хуралдаанаар “Хилийн эрүүл ахуй, хорио цээрийн асуудлаар хамтран ажиллах тухай БНХАУ-ын Гаалийн ерөнхий газар, Монгол Улсын Гаалийн ерөнхий газар хоорондын протокол”-ын хэрэгжилтийн тайлан, 2024 оны зоонозын халдварт өвчний тандалт судалгааны үр дүнг хэлэлцэж, хамтран ажиллах 2025-2028 оны төлөвлөгөөг хэлэлцлээ.
Энэ удаагийн хуралдаанаар Монгол-Хятадын зоонозын халдварт өвчний хамтарсан тандалт судалгааны ажлын зохион байгуулалт болон 2 талын зүгээс хиймэл оюун ухаан болон цахимд суурилсан тодорхой зохицуулалтуудыг хийх, Замын-Үүд- Эрээний эдийн засгийн чөлөөт бүс дээр гаалийн хорио цээрийн хяналтыг хэрхэн төлөвлөх, 2 жил тутам халдварт өвчний хяналтын чиглэлээр үзүүлэх сургууль хийх, гаалийн улсын байцаагч, мэргэжилтнүүдийг сургах зэрэг асуудлуудыг хэлэлцэн, тохиролцсон бөгөөд протоколоор баталгаажуулан 2 тал гарын үсэг зурлаа. Мөн Эрээн хотын Олон Улсын Аялал жуулчлалын Эрүүл мэндийн төв болон Биоаюулгүй байдлын 3 дугаар түвшний лабораторитой танилцан, туршлага судлав.
