БНХАУ-тай байгуулсан гаалийн “Итгэмжлэгдсэн аж ахуйн нэгж (аeо)-ийг харилцан хүлээн зөвшөөрөх хэлэлцээр”-ийг 6-р сараас хэрэгжүүлж эхэлнэ

Монгол Улсын Гаалийн ерөнхий газар болон Бүгд Найрамдах Хятад Ард Улсын Гаалийн ерөнхий газар хооронд 2019 онд байгуулсан "Монгол, Хятадын Итгэмжлэгдсэн аж ахуйн нэгж (ИААН)-ийг харилцан хүлээн зөвшөөрөх тухай хэлэлцээр"-ийг 2025 оны 06 дугаар сарын 01-ний өдрөөс эхлэн албан ёсоор хэрэгжүүлж эхлэхээр боллоо. 

Дээрх хэлэлцээрийн хүрээнд хоёр улсын Гаалийн байгууллагууд харилцан тохиролцсоны дагуу нөгөө талын ИААН-ийн гаалийн бүрдүүлэлтэд “Гаалийн бүрдүүлэлтийг дараалал харгалзахгүй хийх, гаалийн холбоо баригчийг томилж, бүрдүүлэлт хийх явцад үүсэх хүнрэлтэй асуудлыг шийдвэрлэх, бичиг баримт болон бараанд хийх шалгалтыг бууруулж, хамгийн бага түвшинд хийх” зэрэг хөнгөлөлтүүдийг тус тус эдлүүлэх юм. 

Өөрөөр хэлбэл ИААН нь хоёр талын Гаалийн байгууллагаас олгосон үсэг, тоо бүхий “ИААН код” (Жишээ нь: Монгол Улсын ИААН-ийн код: MN1234567890; БНХАУ-ын ИААН-ийн код: AEOCN1234567890)-ыг нөгөө талын импортын гаалийн мэдүүлгийн “Илгээгч тал”-ын мэдээлэлд оруулснаар хөнгөлөлт эдлэх боломж бүрдэнэ. 

Энэхүү хэлэлцээр албан ёсоор хэрэгжиж эхэлснээр хоёр улсын хил дамнасан худалдааны урсгалыг нэмэгдүүлэх, гаалийн бүрдүүлэлтэд зарцуулах цаг хугацаа, зардлыг бууруулахад ач холбогдолтой. Цаашид итгэмжлэгдсэн ААН хөтөлбөрийн үр өгөөжийг нэмэгдүүлэхийн тулд аж ахуйн нэгжүүдийг “итгэмжлэгдсэн ААН” статустай болохыг уриалж байна.