Бурханч лам Г.Пүрэвбат агсны охин П.Анхаа Ханаа: Өвөөд бид гэрээслэлийг харуулсан нуусан юм огт байхгүй
Би аавдаа “Аав минь бүх юмаа тодорхой болгоорой би дараа нь үзэлцэхгүй шүү” гэж эрхлээд хэлдэг байсан. Гэтэл яг аавыг явахаар үзэлцдэг л юм байна. Яагаад гэхээр дараа нь “Охин нь хичээсэн шүү” гэж аавдаа хэлэх үгтэй байхын тулд ээж дүү бид 3 үнэхээр хичээж байгаа хэмээн хоолой нь зангиран ярих энэ охиныг Г.Пүрэбатын Анхаа Ханаа гэдэг. Одоо 31 настай кино продюсер, төслийн менежрээр ажилладаг. Сүүлийн үед Бурханч лам Г.Пүрэвбатын Аглаг бүтээлийн хийдийн өмчлөл болон гэрээслэлийн талаарх үүсээд байгаа асуудлын талаар бид түүнтэй хэсэг хором ярилцлаа.
Тэрбээр аавынхаа захиас, өөрийнхөө мөрөөдсөн Монгол Солонгосын зах зээлийг нийлүүлж дэлхийд гаргах гэсэн жишиг төсөл хэрэгжүүлэхээр зорьж буйгаа онцолсон юм.
-Аав ээжийнхээ танилцсан түүхээс хуваалцаач?
-Манай аав ээж хоёр Энэтхэгийн Дарамсалад бурханы зураг зурж сурч байгаад танилцаж байсан түүхтэй. Аль алиных нь түүх маш сонирхолтой яг л кино шиг амьдарлаар амьдарсан. Аав ээжид анх “Монголынхоо шашин соёлыг дахин сэргээх ажилд хувь нэмэр оруулах” санал тавьж Монголд очоод гуравхан жил туслачих гэж хэлж байсан гэсэн. Тэгээд тэр хоёр бурхан багшийн урд гэрлэлтээ батлуулж байхдаа гурван мянган удаа мөргөж хуримаа хийж байсан гэж ярьдаг. Аав ээж хоёр маань үнэхээр бүх зүйлийг тэгээс эхэлсэн. Анх Ганданд урлахуй ухааны сургууль байгуулаад анхны шавь нараа авсан гэдэг. Тухайн үед мөнгө төгрөг хомс ээж маань Монголын бурхан шашин өв соёлын талаар Солонгосоор нийтлэл бичиж өгөөд 100 долларын цалин авдаг. Тэр цалингаараа амжиргаагаа залгуулж, сургуульдаа шавь нартаа зарцуулдаг байсан гэж ярьдаг. Аав ээж хоёр бүх амьдарлаа үүнд зориулсан хүмүүс.
-“Аглаг бүтээл”-ийн хийдийн "Удирдах зөвлөл" таны аавын гэрээслэлийг ч үзүүлээгүй нууж байгаа гэх асуудал яригдаад байгаа. Ер нь анх энэ асуудал юунаас эхэлсэн бэ?
- Аав нэг жил намайг дагуулж нотариат дээр очиж гэрээслэл хийж байсан. Тухайн үед би “муу ёртой” гээд хүлээн зөвшөөрөхгүй, дургүй байсан ч ээж маань хийсэн нь зөв байх гээд хийж байсан. Тэгээд аавд гэрээслэлийн нэг хувь үлдсэн байв. Дараа нь манай дүүгийн төрсөн өдрөөр аав гэрээслэлээ задлаад “За та хоёрт аав нь бүх юмаа үлдээлээ шүү. Та хэд маань хамгаалаарай, өв соёлоо түгээгээрэй, зөв хүмүүсээ сонгоорой” гэсэн. Яг үнэндээ өнгөрсөн нэг жилийн хугацаанд бидэнд үйл ажиллагааг тасалдуулахгүй байх чухал гээд гэрээслэл бодох сөхөө байгаагүй. Бид хийдийн үйл ажиллагааг тасалдуулахгүйн тулд аль болох долоо хоног болгон лам нараа залж ном хуруулж, сүсэгтэн олондоо ном хуртай байгаа. Мэдээж бид Аав шиг төгс хийж чадахгүй байгаа байх яаж аавыг орлуулах билээ дээ. Судалж суралцаж л явна. Мөн зөв удирдлага гарч ирэхийг хүлээж байгаа. Аав “өв соёлоо түгээ” гээд хэлчихсэн би түүнийг нь кино болгоно гээд явж байгаа киноны хүн. Одоо ч киногоо хийгээд л явж байгаа. Харин өвөөд бид гэрээслэлийг харуулсан. Нотариатын танхимд нэг хувь нь байгаа. Тус хувийг шүүхийн шийдвэрээр л гаргаж харуулдаг юм билээ. Гэхдээ манай гэр бүлийн гишүүд хооронд болон ах дүү нар дунд ямар ч асуудал байхгүй шүү.
-Удирдах зөвлөлийн гишүүд танай гэр бүлийг шүүхэд өгсөн гэсэн. Уг асуудлын талаар
-Аавыг өнгөрсөний дараа нэг жилийн ойн дээр л асуудал үүсч эхэлсэн. Эхлээд бид нарыг эрүүгийн хэргээр шүүхэд өгсөн байсан. Би аймар их айдастай байсан. Тэгээд бүх юмыг нь шалгаж үзээд баримтууд нь нотлогдоогүй. Угаасаа бүх юм байгаагаараа, үйл ажиллагаа нь тасалдаагүй үргэлжилж л байгаа шүү дээ. Гэтэл дахиад иргэний шүүхэд өгчихсөн байсан. Одоо яг дөнгөж процесс дундаа л явж байгаа байх.
