Тогны үнэ нэмж улсын төсвийг Увс руу урсгасан Б.Чойжилсүрэнг эргүүлэн татъя
МАН-ын хамгийн хөрөнгөлөг сайдуудын нэг бол Эрчим хүчний сайд Б.Чойжилсүрэн. Тэрбээр УИХ-д төр түлшилцээд 20 шахам жилийн нүүрийг үзэж байна. Энэ хугацаанд улсад хөрөнгө оруулалт, ард түмэнд ашигтай бодлого хэрэгжүүлэхээс илүү өөрийн бизнесийг өргөжүүлж их хотын нэг хэсгийг бетонон ширэнгэ болгоод амжсан хүн.
Хувийн бизнесээ улсын эрх ашгаас илүүд үздэг Б.Чойжилсүрэнгийн дураараа дургилт хэрээс хэтрэв. Учир нь хэдхэн хоногийн өмнө Увс аймгийн 100 жилийн ойн баяр наадам өргөн дэлгэр болж өндөрлөсөн. Энэ үеэр Эрчим хүчний сайд Б.Чойжилсүрэн "Орон нутаг, улсын төсвөөс 22 тэрбум төгрөг зарцуулсан. Улаангомын Төв цэнгэлдэх орчмын тохижилт цахилгаан хангамж, төв замын гэрэлтүүлгийг шийдвэрлэхэд миний сайдын багцаас 2 тэрбум төгрөг гарсан" хэмээн хээв нэг яриж суух нь олны дургүйцлийг хүргээд байна.
Эрчим хүчний салбар нь элгээрээ хэвтсэн энэ үед салбарын сайд нь төсвийн мөнгийг өөрийн халаасны мөнгө аятай захиран зарцуулж аймаг сумын баяр наадам хийгээд явж байх нь хэр зохилтой вэ?
ДЦС-3-т өнгөрсөн сарын 2-нд томоохон осол гарч, эрдэнэт хүний амь эрсэдсэн. Угаасаа эрчим хүчний чадлын дутагдалд орчихсон атлаа 50 МВт-ын турбогенератороо шатааж, олон тэрбум төгрөгийн алдагдал үүссэн.
2025-2026 оны өвөл дулаан, цахилгаан хослон ажиллаж байсан горимыг зөвхөн дулаан үйлдвэрлэх горим руу шилжүүлнэ. Үүнд 8.5 тэрбум төгрөг шаардлагатай. "ДЦС-3"-ын байшинд гал гарч, сүйдсэн тул 7 тэрбумаар засварлах тооцоо бий. Ингээд эхний ээлжид 15.5 тэрбум төгрөг шаардлагатай. Мөн үүн дээр гаднаас худалдаж авах турбогенераторын үнэ нэмэгдэнэ. Бас л хэдэн тэрбумаар яригдах нь ойлгомжтой. Харин Ч.Чойжилсүрэн сайд энэ бүхэнд санаа зовохгүй байгаа бололтой. Сайдын багцаа гарын салаагаараа урсгаж сууна.
Ийнхүү төрд олон жил бугшиж буй эдгээр сайдуудыг төрийн өндөр суудлаас нь эргүүлэн татахыг иргэд олон нийт уриалж эхэлжээ.
