Олон улсын олимпиадад шавь нараа амжилттай бэлтгэн оролцуулсан багшид түрээслээд өмчлөх хэлбэрийн орон сууцны 150 сая төгрөгийн эрхийн батламж гардуулжээ

2025 онд Монгол Улсын сурагчид олон улсын математик, хими, физик, биологи, газарзүй, мэдээлэл зүйн олимпиадуудаас бүгдээс нь медаль хүртсэн бахархам амжилтыг үзүүлсэн билээ. Олимпиадын хорооны удирдлагын дор сургууль, дүүрэг, аймаг/нийслэлийн олимпиадууд зохион байгуулагдаж, шалгарсан шилдэг сурагчид нь олон улсын олимпиадад оролцох эрхийн эзэн болдог.

Монгол Улс 1964 оноос эхлэн Олон улсын Математикийн олимпиад /IMO/-д анх оролцож эхэлсэн бол хамгийн сүүлд Олон улсын Газарзүйн олимпиадад албан ёсоор нэгдэн оролцож эхлээд байна.

Энэ жил нийслэлийн ерөнхий боловсролын сургуулийн сурагчид 6 хичээлээр олон улсын олимпиадад оролцож, алт, мөнгө, хүрэл медаль, тусгай байруудыг эзэлж өндөр амжилтыг үзүүлсэн. Олон улсын олимпиадад амжилт гаргасан нийслэлийн 20 сурагч, багшийг Нийслэлийн засаг дарга Х.Нямбаатар хүлээн авч уулзан баяр хүргэж, шагнаж урамшуулсан байна.

Олон улсын олимпиадад шавь нараа амжилттай бэлтгэн оролцуулж, алтан медальд хүргэсэн нийслэлийн ерөнхий боловсролын 11 дүгээр сургуулийн багш Ж.Ёндонсамбууд түрээслээд өмчлөх хэлбэрийн орон сууцны 150 сая төгрөгийн эрхийн батламжийг гардуулав. Мөн олон улсын олимпиадаас алтан медаль хүртсэн сурагчид 3 сая төгрөг, мөнгөн медаль хүртсэн сурагчдад 2 сая төгрөг, хүрэл медаль хүртсэн сурагчдад 1 сая төгрөг, тусгай байр эзэлсэн сурагчийг 500 мянган төгрөгөөр тус тус урамшуулсан юм.

Монгол хүүхдүүд олон улсын 6 хичээлийн олимпиадаас дараах амжилтуудыг гаргалаа.

• Олон улсын Математикийн олимпиадад 110 орны 610 сурагч оролцсон бөгөөд Монгол Улсаас НЕБ-ын 11-р сургууль, Сант, Шинэ-Үе сургуулийн 6 суралцагч оролцож, 1 алт , 3 мөнгө , 2 хүрэл медалийг хүртсэн.
• Олон улсын Физикийн олимпиадад 87 орны 415 суралцагч оролцсон бөгөөд Монгол Улсаас МУИС-ийн харьяа ЕБ-ын ахлах сургууль, НЕБ-ын 1-р сургууль, Сант, Абсолют элит сургуулийн 5 сурагч оролцож, 2 мөнгө, 3 хүрэл медалийг хүртсэн.
• Олон улсын Биологийн олимпиадад 77 орны 298 сурагч оролцсон бөгөөд Монгол Улсаас НЕБ-ын Орчлон, Монгол тэмүүлэл сургуулийн 2 суралцагч оролцож, 1 хүрэл медаль , 1 тусгай байрын шагналыг хүртсэн.
• Олон улсын Химийн олимпиадад 90 орны 354 сурагч оролцсон бөгөөд Монгол Улсаас НЕБ-ын Орчлон, Шинэ монгол, Бага тэнгэр сургуулийн 4 суралцагч оролцож, 4 мөнгөн медалийг хүртсэн.
• Олон улсын Мэдээлэлзүйн олимпиадад 87 орны 330 сурагч оролцсон бөгөөд Монгол Улсаас НЕБ-ын Эрхэт эрдэм сургуулийн 1 суралцагч мөнгөн медалийг хүртсэн.
• Олон улсын Газарзүйн олимпиадад 47 орны 200 гаруй сурагч оролцсон бөгөөд Монгол Улсаас НЕБ-ын Шинэ эрин, Гёте сургуулийн 2 суралцагч оролцож 2 хүрэл медалийг хүртсэн байна.