Apple компани хамгийн нимгэн утсаа танилцуулав
Apple компани жил бүрийн 9-р сард олон нийтэд шинэ бүтээгдэхүүнээ танилцуулдаг уламжлалтай билээ. Энэ удаад тус компани өмнө нь гаргаж байсан гар утаснуудаасаа хамгийн нимгэн iPhone Air шинэ загварын утсаа танилцуулав. iPhone Air утасны титанан их бие нь 5.6 мм зузаан бөгөөд хүчин чадлаараа Apple компанийн MacBook Pro зөөврийн компьютертой дүйцэх аж. iPhone Air нь зөвхөн e-sim картаар ажиллах ба цэнэгээ өдрийн турш барих хүчин чадалтай аж.
Шинэ iPhone 17 утасны хувьд үйлдлийн систем нь илүү хурдан болсноос гадна дэлгэц нь илүү гөлгөр болсон бол Pro болон Pro Max загвар нь хөргөлтийн шинэ системтэй болсон нь цэнэг барилтыг нь уртасгажээ.
Apple Watch Series 11 цувралын ухаалаг цагууд нь хэрэглэгчдэд цусны даралт нь нэмэгдсэнийг мэдэгдэж, анхааруулах функцтэй болсон байна. Харин AirPods Pro 3 чихэвч нь зүрхний цохилтын тоог хэмжиж, синхрон орчуулга хийх ажээ.
Мөн гадны дуу чимээг илүү сайн тусгаарлаж, зүүгээд явахад илүү таатай, тухтай мэдрэмжийг өгнө гэжээ. Энэ сарын 19-нөөс худалдаанд гарах iPhone Air ухаалаг гар утасны үнэ 999 ам.доллароос, iPhone 17 утасных 799 ам.доллароос, iPhone 17 Pro утасных 1099 ам.доллароос эхэлж байна.
AirPods Pro 3 чихэвчний үнэ 249 ам.доллар байх бол Apple Watch SE 3 цагны үнэ 249 ам.доллар, Apple Watch Series 11 цагных 399 ам.доллар, Apple Watch Ultra 3 цагных 799 ам.доллар байх аж.
