140 мянга гаруй малчны 1,2 их наяд төгрөгийн зээлийн эргэн төлөлтийг хойшлууллаа

Малчны зээлийн эргэн төлөлтийг хойшлуулах санал гаргасныг Монголбанк болон арилжааны банкууд хүлээн авчээ. Энэ талаар Шадар сайд С.Амарсайхан өнөөдөр төв банк болон арилжааны нэр бүхий хоёр банкны удирдлагатай ярилцсан байна.

Малчид Хаан банк, Төрийн банк хоёроос малчны зээл авдаг. Монгол Улсын хэмжээнд 140 мянга гаруй малчин 1.2 их наяд төгрөгийн малчны зээл авсан мэдээлэл байна.

Тодруулбал, 51.2 хувь буюу 618 тэрбум төгрөгийн зээлийг Төрийн банкнаас, 48.5 хувь буюу 585 тэрбум төгрөгийн зээлийг Хаан банкнаас тус тус олгожээ.

Энэ асуудалд Төв банкны зүгээс бодлогын дэмжлэг үзүүлэхэд бэлэн байгаагаа илэрхийлсэн бол Хаан банкны хувьд өнгөрсөн оны арванхоёрдугаар сарын 1-нээс хойш хүсэлт өгсөн малчдын зээлийн эргэн төлөлтийг сунгаж эхэлсэн бөгөөд нэг жил хүртэл хугацаагаар хойшлуулах боломжтой аж. Төрийн банкны хувьд эхний ээлжинд энэ оны зургадугаар сарын 1-н хүртэл зээлийн эргэн төлөлтийг хойшлуулах боломжтойгоо хэлжээ. Малчид харьяа орон нутгийнхаа Хаан банк болон Төрийн банкны салбарт хүсэлтээ цахимаар гаргаж, шийдүүлэх боломж бүрдсэн байна.

Монгол Улсын 330 гаруй сумдаас 250 орчимд нь зуд нүүрлэж, хаваржилт хүндэрснээс малчдын хувьд зээлээ эргэн төлөхөд бэрхшээл үүсч, зээлийн эргэн төлөлтийг хойшлуулж өгөх хүсэлт тавьсан юм байна.

Сануулахад, Covid-19 цар тахал дэгдсэний дараа Засгийн газраас банкуудтай зөвшилцсөнөөр ипотекийн зээлийн эргэн төлөлтийг хойшлуулж байсан юм.